Arrestimi në Francë prish qetësinë e Ergys Agasit në Shqipëri!

Pasi Ermal Beqiri u arrestua në Francë teksa fluturonte me avion privat, në radhët e ish-drejtuesve të AKSHI-t, që deri tani i kanë shpëtuar burgut në Shqipëri, kanë nisur lëvizje të ethshme. Incidenti me avionin rrezikon të shndërrohet në shkëndijën që mund të djegë të gjithë grupin që dikur kontrollonte AKSHI-n.

Njeriu i parë që duket se ka ndjerë pasojat e arrestimit të Beqirit është bashkëpunëtori i tij më i afërt, Ergys Agasi, njeriu që për vite me radhë konsiderohej si garancia e mbështetjes së pakushtëzuar të qeverisë për punët e pista.

Për Ergys Agasin është thënë vazhdimisht se nuk është larguar nga Shqipëria dhe se fshihet jo shumë larg Tiranës.

Por tani që ka marrë vesh për arrestimin e Ermal Beqirit në Francë, burime bëjnë me dije se ai ka humbur qetësinë, pasi duhet të lëvizë dhe të gjejë një vend tjetër ku të strehohet. Garancia e njerëzve që e kanë mbajtur të fshehur deri më tani ka marrë fund.

ERMAL BEQIRI, I ARRESTUAR NË FRANCË SI PJESË E GRUPIT TË STRUKTURUAR KRIMINAL TË AKSHI-T

Shkaku është pikërisht hapi fals që Ermal Beqiri bëri në Francë. Pas ekstradimit, askush nuk mund të parashikojë se deri ku do të shtrihen hetimet, ndaj edhe njerëzit që e strehonin Agasin i kanë lënë afat të gjejë një bazë tjetër. Intuita e tyre nuk duket krejt e pabazë.

Në momentin e arrestimit, përveç pajisjeve AirTag që mbante me vete, policia franceze i gjeti Ermal Beqirit edhe dy pajisje elektronike ku ruheshin komunikimet e tij më të fundit. Nga momenti i largimit nga Shqipëria, muajt e arratisë, jeta në Francë e deri te bisedat me njerëzit më të afërt, të gjitha mesazhet e shkëmbyera me kontaktet në Shqipëri ndodhen tashmë në duart e autoriteteve franceze.

Një detja të tillë e raportoi edhe media franceze Journal du Dimanche, e para që publikoi lajmin për arrestimin e Ermal Beqirit. Sipas gazetarëve francezë, Beqiri u shpjegoi autoriteteve se kishte fluturuar në lartësi të ulët mbi centralin bërthamor sepse po fliste në telefon me nënën e tij dhe biseda e kishte shpërqendruar.

Mbetet ende për t’u parë nëse autoritetet franceze do t’i zbërthejnë vetë komunikimet e gjetura në këto pajisje elektronike, apo nëse ato do t’u dorëzohen autoriteteve shqiptare në momentin e ekstradimit.

Burime bëjnë me dije se Ergys Agasi ka kërkuar me ngulm të kontaktojë qoftë edhe për pak minuta, me njeriun e tij në qeveri, madje deri te kryeministri, në përpjekje për të siguruar garanci që të mund të ruajë vendstrehimin e deritanishëm.

Nëse komunikimet e Ermal Beqirit do të zbardhen nga autoritetet shqiptare, dosja e AKSHI-t mund të hyjë në një fazë të re hetimesh, me pasoja edhe për personat që dyshohet se e kanë ndihmuar gjatë arratisë.

Që prej dhjetorit të vitit 2025 kur u shpall në kërkim, është thënë se Ergys Agasi është fshehur në Shqipëri duke shfrytëzuar lidhjet me grupet kriminale, si shpërblim për favoret e kohës kur ishte pjesë e rrethit më të afërt të Edi Ramës dhe ushtronte ndikim mbi segmentet kryesore të shtetit. Por edhe këto favore kanë një afat.

Miqtë e tij në Durrës, Tiranë apo Elbasan duket se e kanë kuptuar se aventurieri që dikur mburrej me miqësinë me Edi Ramën dhe lëvizte së bashku me eskortën e kryeministrit, sot është kthyer në një barrë. Arrestimi i Beqirit e shton rrezikun për këdo që vazhdon ta strehojë.

Deri tani është raportuar, pa u konfirmuar zyrtarisht, se Agasi është fshehur herë në një resort në periferi të Tiranës, herë në rrethinat e Durrësit pranë miqve të tij Troplinët, e herë në bazën e Suel Çelës në Elbasan.

Kur u publikua dosja e AKSHI-t, të dhënat e prokurorisë përputheshin pothuajse plotësisht me përshkrimin që Arben Ahmetaj i kishte bërë vite më parë Ergys Agasit, kur e quajti “koordinatorin e krimit” të Edi Ramës. Përgjimet zbuluan skemën e ngritur për grabitjen e qindra milionë eurove përmes tenderëve të manipuluar, korrupsionin e zyrtarëve të AKSHI-t, si edhe përfshirjen e grupeve kriminale për të ushtruar presion ndaj biznesmenëve konkurrentë.

Sipas Ahmetajt, marrëdhënia mes Ergys Agasit dhe Edi Ramës ishte jashtëzakonisht e afërt. Ai ka deklaruar se e ka parë vetë Agasin në zyrën e kryeministrit duke konsumuar një verë me vlerë 33 mijë euro./Lapsi