Dua Lipa dhe Lea Ypi tjetër mesazh shqiptarëve: Mos u dorëzoni!

Një bisedë e veçantë mes yllit botëror të muzikës pop, Dua Lipa, dhe filozofes së njohur Lea Ypi ka rikthyer në fokus debatin mbi demokracinë, rolin e elitave politike dhe fuqinë e protestës qytetare. Në episodin më të fundit të podcast-it “Service95 Book Club”, dyshja ndalet te zhvillimet në Shqipëri dhe mesazhet që përcjellin lëvizjet qytetare përballë apatisë politike.

Gjatë diskutimit, Dua Lipa solli në vëmendje një nga sloganet më të forta të protestave: “Shqipëria nuk shitet”, duke iu referuar edhe një pyetjeje të një dëgjuesi: “Si mund të shmangim lodhjen nga protestat?”. Kjo pyetje hapi një debat më të gjerë mbi mënyrën se si qytetarët mund të qëndrojnë aktivë dhe të angazhuar në jetën demokratike.

Lea Ypi theksoi se demokracia nuk duhet parë vetëm si një proces që realizohet në ditën e zgjedhjeve, por si një praktikë e përditshme që ushqehet edhe përmes protestave dhe reagimeve qytetare.

“Është e rëndësishme ta kuptojmë demokracinë si diçka që jeton përmes këtyre momenteve, dhe jo ta reduktojmë atë vetëm në votim apo te elitat politike. Protestat mund të jenë krijuese, ato mund të gjenerojnë ide dhe projekte të reja,” shprehet Ypi.

Ajo shtoi se rezistenca ndaj apatisë dhe cinizmit është thelbësore për funksionimin e një shoqërie demokratike. Sipas saj, mënyra se si janë zhvilluar disa prej protestave në Shqipëri – me këngë, valle dhe gjeste simbolike si shpërndarja e luleve – tregon një formë të re dhe frymëzuese të reagimit qytetar.

Nga ana tjetër, Dua Lipa e vlerësoi këtë qasje si një mënyrë ndryshe dhe pozitive për të shprehur pakënaqësinë, duke theksuar se forma të tilla mund të shërbejnë si shembull edhe për vende të tjera që përballen me sfida të ngjashme politike.

Biseda në podcast:

Dua Lipa: Do të doja t’ua kaloja fjalën në këtë moment lexuesve të Service95, sepse kam disa pyetje nga ata për të ndarë. Kjo pyetje lidhet me protestat “Shqipëria nuk shitet”, dhe thotë: “Si mund të shmangim lodhjen nga protestat?” – Cassidy

Lea Ypi: Mendoj se është e rëndësishme ta shohim demokracinë si diçka që jeton edhe përmes këtyre rasteve të protestës, dhe jo ta reduktojmë demokracinë thjesht në pjesëmarrje në zgjedhje, jo ta reduktojmë te elitat ekzistuese, dhe të mos mendojmë se e kemi kryer detyrën thjesht në atë ditë kur kemi shkuar dhe kemi zgjedhur një përfaqësues në vend të një tjetri. Dhe të kuptojmë se në këto raste, protestat mund të jenë gjithashtu krijuese. Ato mund të gjenerojnë ide, mund të gjenerojnë projekte, dhe…

Dua Lipa: Po.

Lea Ypi: Për mua, është shumë përcaktuese t’i përmbahemi kësaj dhe të mos i dorëzohemi apatisë e cinizmit. Dhe këtu, në fillim, njerëzit po këndonin, po kërcenin dhe po u shpërndanin lule policisë, kështu që ishte thjesht një mënyrë vërtet ndryshe për të bërë një protestë…

Dua Lipa: Po, për të protestuar.

Lea Ypi: …të cilën e ndjeva se ishte vërtet frymëzuese dhe mund të shërbente si shembull se si vendet e tjera duhet t’u përgjigjen elitave të tyre dhe t’i përgjigjen kësaj kapjeje oligarkike të politikës.

Biseda mes dy figurave të njohura ndërkombëtarisht sjell në vëmendje rëndësinë e pjesëmarrjes aktive në shoqëri dhe rolin që kanë qytetarët në mbrojtjen e vlerave demokratike përtej institucioneve tradicionale.