Vendi ‘zien’ nga protestat, Rama ‘ikën për Dhërmi lalee’ (VIDEO)

Ndërsa protestat kundër qeverisë vijojnë pa ndërprerje dhe kanë hyrë në ditën e 66-të, me kërkesën kryesore për dorëheqjen e kryeministrit Edi Rama, ky i fundit duket se po vazhdon normalisht pushimet verore në jug të vendit.

Kreu i qeverisë është parë këtë të martë në zonën e Dhërmiut, ku është filmuar duke lundruar me skaf në det. Pamjet janë shpërndarë në rrjetet sociale nga një prej faqeve më aktive në mbështetje të protestave qytetare.

Në video, Rama shfaqet i qetë dhe i relaksuar, i veshur me kapele dhe syze dielli, ndërsa shijon momentet në det në shoqërinë e bashkëshortes. Në skaf vihet re edhe prania e dy fëmijëve të vegjël, duke e kthyer këtë dalje në një moment familjar.

Prej ditësh në protestat qytetare është pretenduar se presioni i tyre ka ndikuar në ndryshimin e agjendës së kryeministrit, duke e detyruar atë të ndërpresë pushimet. Megjithatë, pamjet e fundit sugjerojnë të kundërtën, duke treguar se Rama ka vijuar rutinën e zakonshme verore pas përfundimit të sesionit parlamentar.

Shfaqja e tij në Dhërmi vjen në një moment kur situata politike në vend mbetet e tensionuar dhe protestat vazhdojnë të mbajnë të njëjtin ritëm, duke rritur kontrastin mes realitetit në terren dhe aktivitetit të kreut të qeverisë.