7 viktima dhe 23 të zhdukur

Një tragjedi detare është regjistruar pranë brigjeve të Kyrenias, në veri të Qipros, ku anija “FILOJET”, me 267 persona në bord, është përmbysur pasi nisi të merrte ujë.

Pamjet e publikuara tregojnë momentet e fundit brenda anijes. Pasagjerët përfshihen nga paniku, ndërsa mjeti lundrues humbet qëndrueshmërinë dhe më pas përmbyset.

Anija ishte nisur nga porti i Kyrenias drejt Taşucut, në provincën turke të Mersinit. Pak kohë pas nisjes, ekuipazhi raportoi se në anije po hynte ujë. Sipas autoriteteve, në bord ndodheshin 259 pasagjerë dhe tetë anëtarë të ekuipazhit.

Ngjarja ndodhi rreth katër milje detare larg Kyrenias, duke aktivizuar një operacion masiv kërkim-shpëtimi. Në operacion u angazhuan Roja Bregdetare e Qipros së Veriut dhe ajo e Turqisë, helikopterë dhe mjete civile, të cilat ndihmuan në nxjerrjen e pasagjerëve nga deti.

Sipas bilancit paraprak të raportuar nga autoritetet, 237 persona janë shpëtuar, shtatë kanë humbur jetën, ndërsa 23 të tjerë rezultojnë ende të zhdukur.

Operacioni i kërkim-shpëtimit vijon, ndërsa autoritetet kanë nisur hetimet për përcaktimin e shkakut të fundosjes së anijes.