Flakët arrijnë në vargmalin e Skënderbeut

Situata nga zjarri në fshatin Lundër është përkeqësuar gjatë orëve të fundit. Flakët kanë dalë jashtë kontrollit dhe po përhapen me shpejtësi në terrenin malor, duke rrezikuar banesa, stalla, objekte bujqësore dhe sipërfaqe të mëdha pyjore.

Strukturat e emergjencave civile po punojnë për izolimin e vatrave, por ndërhyrja nga toka nuk ka dhënë rezultatet e pritshme. Përmasat e zjarrit, tymi i dendur dhe terreni i thyer po vështirësojnë ndjeshëm punën e forcave zjarrfikëse.

Ekipet në terren po përpiqen të krijojnë një perimetër mbrojtës pranë zonave të banuara, ku rreziku për banesat dhe objektet bujqësore mbetet i lartë.

Për shkak të përhapjes së shpejtë, flakët kanë depërtuar deri në vargmalin e Skënderbeut. Në zonë kanë mbërritur edhe forcat e Policisë së Shtetit, të cilat po monitorojnë situatën dhe po marrin masa për mbrojtjen e banorëve.

Në mbështetje të forcave tokësore është angazhuar edhe një helikopter i Emergjencave Civile. Mjeti fluturues ka nisur hedhjen e ujit mbi vatrat më të izoluara dhe të paarritshme nga toka, me synimin për të frenuar përhapjen e zjarrit dhe për ta vënë atë nën kontroll.

Deri tani nuk raportohet për persona të lënduar, ndërsa operacioni për shuarjen e flakëve vijon.