Irini Qirjako rrëfen takimin me aktorin e Hollivudit: Donte foto me mua

Këngëtarja Irini Qirjako ka ndarë një prej episodeve më të veçanta të karrierës së saj, duke sjellë në kujtesë takimin me yllin e Hollywood-it, Michael Douglas, gjatë vizitës së aktorit amerikan në Shqipëri në vitin 2000.

Qirjako tregoi se në atë periudhë ishte organizuar një koncert në Pallatin e Kongreseve nga Ministria e Kulturës. Ajo ishte pjesë e programit artistik dhe interpretoi një këngë polifonike shqiptare, performancë që, sipas rrëfimit të saj, tërhoqi vëmendjen e veçantë të Michael Douglas.

“Aktori i madh i Hollivudit, Michael Douglas kur ka qenë në Shqipëri në vitin 2000, Ministria e Kulturës organizoi një koncert te Pallati i Kongreseve. Unë kisha një këngë polifonike. Michael Douglas kur e dëgjoi ngeli pa frymë”, rrëfeu këngëtarja.

Pas përfundimit të interpretimit, Irini Qirjako mendonte se gjithçka kishte mbaruar dhe po përgatitej të largohej nga ambientet e koncertit. Në atë moment, ajo u ndalua nga truprojat e aktorit amerikan, të cilët i përcollën dëshirën e Douglas për ta takuar.

“Unë mbarova në skenë dhe do ikja, do më merrte im shoq. Ata truprojat më thirrën: ‘Irini, Irini, mos ik, aktori i madh Douglas do të bëjë foto me ty’”, tregoi Qirjako.

Takimi mes tyre, sipas këngëtares, ishte i përzemërt. Ajo kujtoi se aktori e përqafoi dhe më pas i foli për përshtypjen që i kishte lënë interpretimi i saj.

“Më përqafoi me kaq dashuri. Tha: ‘Diçka të tillë nuk e kam dëgjuar kurrë në jetë, kjo ishte një mrekulli që kam parë në jetën time’”, u shpreh ajo.

Rrëfimi i Irini Qirjakos rikthen një episod të veçantë nga vizita e Michael Douglas në Shqipëri, por njëkohësisht edhe një moment që këngëtarja e ka ruajtur ndër kujtimet më të çmuara të rrugëtimit të saj artistik.

Takimi i vitit 2000, i nisur nga një interpretim polifonik në skenën e Pallatit të Kongreseve, mbeti për të një prej atyre momenteve të rralla që vijojnë të kujtohen me emocion edhe pas shumë vitesh.