“Jeni të gjithë të filmuar”, Berisha “shpërthen” ndaj Peleshit

Kreu i Partisë Demokratike, Sali Berisha, e ka vendosur sërish në qendër të diskutimeve në Kuvend çështjen e ish-drejtoreshës së SHISH, Vlora Hyseni, ndaj së cilës është caktuar masa e sigurisë “arrest në shtëpi”. Në fjalën e tij, Berisha ngriti një seri akuzash lidhur me Ergys Agasin, përdorimin e mjeteve të sigurisë dhe mënyrën e funksionimit të Shërbimit Informativ.

Gjatë seancës plenare, Berisha e lidhi çështjen e Hysenit me atë që ai e cilësoi si një problem të rëndë të sigurisë kombëtare. Sipas pretendimeve të kreut të PD-së, informacionet dhe kapacitetet teknike të institucioneve të sigurisë janë përdorur në funksion të interesave të grupeve dhe personave të caktuar.

Berisha përmendi në fjalën e tij edhe biznesmenin Ergys Agasi, duke pretenduar se ai kishte përfituar nga përdorimi i mjeteve dhe informacioneve që lidhen me strukturat e sigurisë.

“Lubi Balluku ka vjedhur qindra milionë, ka prodhuar një ushtri Agasësh, por prapë ato janë dëme në euro, vjedhje, plaçkitje. Sekreti i shtetit ka qenë në duart e Lubisë tjetër”, deklaroi Berisha.

Ai vijoi duke folur për rolin që, sipas tij, ka SHISH në administrimin e informacioneve sensitive shtetërore dhe ngriti pretendimin se këto të dhëna mund të jenë përdorur jashtë qëllimit institucional.

“Shefi i shërbimit informativ di çdo sekret, dhe aq sa di kryeministri dhe presidenti, i di prej atij ose asaj”, u shpreh kreu i PD-së.

Në vijim, Berisha bëri një tjetër pretendim të drejtpërdrejtë për Agasin dhe Hysenin, duke thënë se ish-drejtorja e SHISH kishte vënë në dispozicion të tij mjete të sofistikuara të sigurisë.

“Ajo, siç rezulton, e ka pajisur organizatën kriminale të Ergys Agasit me mjetet më të sofistikuara të regjimit”, deklaroi Berisha.

Ai përmendi gjithashtu pretendime për regjistrime dhe materiale filmike, duke iu drejtuar deputetëve dhe zyrtarëve të pranishëm në sallë.

“Të gjithë jeni në dosje të filmuar. Ulsi, të ka dalë shumë herë emri. Po nuk je vetëm ti. Nuk je jo, je me plot të tjerë”, tha Berisha.

Sipas tij, pajisjet që duhet të shërbenin për sigurinë kombëtare dhe monitorimin e kërcënimeve ndaj shtetit mund të jenë përdorur për qëllime të tjera. Berisha pretendoi se këto mjete, të blera me fondet e taksapaguesve shqiptarë ose të siguruara përmes partnerëve ndërkombëtarë, janë përdorur në funksion të përplasjeve mes grupeve të ndryshme.

Në këtë kontekst, ai përmendi edhe emrat “Troplinët”, “Çelët” dhe grupe të tjera, duke i lidhur pretendimet e tij me mënyrën se si, sipas tij, janë përdorur strukturat shtetërore të sigurisë.

Pjesë e debatit në Kuvend u bë edhe kryetari i Kuvendit, Niko Peleshi. Berisha iu rikthye një deklarate të bërë prej tij disa ditë më parë, kur kishte pretenduar se Peleshi mund të zëvendësohej në krye të Kuvendit.

“Tani edhe një gjë ti zotëri, kur unë deklarova para pesë-gjashtë ditësh se kanë parashikuar të të zëvendësojnë me atë tjetrin, ti u solle si tuhaf”, iu drejtua Berisha Peleshit.

Kryetari i Kuvendit iu përgjigj shkurt duke thënë: “Më merr të keqen”.

Debatet e sotme në Kuvend vijnë në një kohë kur çështja e ish-drejtores së SHISH, Vlora Hyseni, është kthyer në një nga temat kryesore të përplasjes politike. Hyseni është nën masën “arrest në shtëpi” në kuadër të hetimeve të SPAK, ndërsa pretendimet e bëra nga Berisha në Kuvend përbëjnë qëndrimin e tij politik dhe nuk duhet të interpretohen si konstatime përfundimtare të drejtësisë.

Debati:

Sali Berisha: Lubi Balluku ka vjedhur qindra milionë, ka prodhuar një ushtri Agasësh, por prapë ato janë dëme në euro, vjedhje, plaçkitje.
Sekreti i shtetit ka qenë në duart e Lubisë tjetër.

Shefi i shërbimit informativ di çdo sekret, dhe aq sa di kryeministri dhe presidenti, i di prej atij ose asaj.

Ajo, siç rezulton, e ka pajisur organizatën kriminale të Ergys Agasit me mjetet më të sofistikuara të regjimit.

Të gjithë jeni në dosje të filmuar. Ulsi, të ka dalë shumë herë emri.

Po nuk je vetëm ti. Nuk je jo, je me plot të tjerë.

Ku janë këta Agasët e Ballukut e të tjerë me radhë?

Pra, aty në zyrë që krijoi, të pajisur me të gjitha mjetet më të sofistikuara, të blera nga taksapaguesit shqiptarë ose dhuratë e partnerëve tanë për sigurinë kombëtare, për vëzhgimin e armiqve, janë përdorur për të gjitha qëllimet e ulëta të luftës brenda klaneve.

Janë përdorur që të gjitha në funksion të Troplinëve, Çelëve dhe bandave të tjera.

Tani edhe një gjë ti zotëri, kur unë deklarova para pesë gjashtë ditësh se kanë parashikuar të të zëvendësojnë me atë tjetrin, ti u solle si tuhaf.

Peleshi: Më merr të keqen