Kryeministri me tone të ashpra: Pavarësinë e Drejtësisë nuk e solli Amerika as Europa!

Kryeministri Edi Rama ka deklaruar se nuk pranon të ndajë me aktorë të tjerë autorësinë politike të reformës në drejtësi, duke e cilësuar atë si një prej vendimeve më të rëndësishme të ndërmarra nga qeveria dhe Partia Socialiste.

Në një deklaratë publike, Rama foli për procesin e reformimit të sistemit të drejtësisë dhe rolin që kanë luajtur në të Shqipëria, Shtetet e Bashkuara të Amerikës dhe Bashkimi Europian. Kryeministri vlerësoi mbështetjen ndërkombëtare, por këmbënguli se reforma, sipas tij, nuk do të kishte marrë formën që ka sot pa angazhimin politik të mazhorancës.

Rama argumentoi se ndërhyrja për ndryshimin e sistemit të drejtësisë ishte një vendim me kosto të lartë politike për Partinë Socialiste. Sipas tij, kjo nismë kishte për qëllim shkëputjen e drejtësisë nga ndikimi politik dhe krijimin e institucioneve që mund të funksionojnë në mënyrë të pavarur.

“Koha kur në këtë vend drejtësia ishte një derë e mbyllur sa herë trokiste e drejta dhe e hapur kur e keqja donte të ulej këmbëkryq për pazar, nuk vjen më. Nuk kthehet më koha kur pushteti politik dhe pandëshkueshmëria ishin e njëjta gjë”, u shpreh Rama.

Kryeministri tha se reforma ishte një proces që kërkonte marrjen përsipër të një përgjegjësie të madhe politike dhe e paraqiti atë si një përpjekje për të ndryshuar raportin mes pushtetit dhe institucioneve të drejtësisë.

“Unë dhe PS i hymë detit me këmbë dhe morëm përsipër reformën më të thellë dhe të dhimbshme, aktin e dorëzimit të shpatës së drejtësisë nga duart e pushtetit politik në duart e drejtësisë të çliruar dhe të pavarësuar”, deklaroi ai.

Rama: Reforma nuk erdhi vetëm nga ndërkombëtarët

Një pjesë e deklaratës së kryeministrit iu kushtua rolit të SHBA-së dhe BE-së në reformën në drejtësi. Rama pranoi kontributin dhe mbështetjen e partnerëve ndërkombëtarë, por kundërshtoi idenë se pavarësia e sistemit të drejtësisë ishte rezultat vetëm i angazhimit të tyre.

Sipas tij, vendimmarrja politike shqiptare ishte elementi që bëri të mundur zbatimin e reformës.

“Pavarësia e drejtësisë nuk ra nga qielli, nuk e solli as koha, as SHBA dhe as Europa. Ata ndihmuan, por pa ne do të kishin bërë një Noc Rrok”, tha Rama.

Në vijim, ai e cilësoi reformën si një arritje politike që, sipas tij, nuk është e negociueshme sa i përket autorësisë.

“E bëra unë, jo se isha naiv, as se nuk e dija që do të kërkonte koka, por sepse ishte imja, jona barra e asaj sakrifice të madhe politike”, deklaroi kryeministri.

Rama u ndal edhe te zhvillimet e sotme në sistemin e drejtësisë, duke pretenduar se për herë të parë sistemi po tregon kapacitete për të hetuar dhe larguar nga radhët e tij persona që dyshohet se kanë shkelur ligjin.

“Sot, për herë të parë në historinë e shtetit shqiptar është vetë sistemi që po shfaq aftësi vetëpastrimi që s’i ka pasur kurrë. Kjo është arritje e madhe, autopsinë e së cilës nuk e negocioj me askënd”, u shpreh ai.

“SPAK-u nuk është armë kundër meje”

Në pjesën e fundit të deklaratës, kryeministri iu përgjigj edhe kritikëve që e lidhin reformën në drejtësi me përplasjet politike dhe hetimet e SPAK-ut.

Rama tha se nuk e sheh SPAK-un si një instrument të krijuar kundër tij dhe akuzoi kundërshtarët e tij se e trajtojnë institucionin e drejtësisë si një mjet politik.

Ai deklaroi gjithashtu se rezultati i zgjedhjeve është treguesi kryesor i mbështetjes politike që ka marrë Partia Socialiste.

“Nuk e solli pavarësinë e drejtësisë sorrat e korbat që bërtasin ‘korrupsion’ dhe shikojnë SPAK-un si armë kundër meje, që i kam mundur dhe i mund në çdo zgjedhje sa herë u bie mendja se më zunë ngushtë dhe më bënë gropën”, tha Rama.

Kryeministri shtoi se nuk e konsideron presionin politik nga kundërshtarët si shqetësimin kryesor, duke e lidhur vëmendjen e tij me mënyrën se si po zhvillohen hetimet dhe proceset e drejtësisë.

“Nuk është mundja e tyre ajo që më prish gjumin dhe as fryrja e pulëkakarisja e tyre. Kjo lidhet me çfarë po ndodh, me korrupsionin dhe drejtësinë”, përfundoi Rama.