S’ka kthim pas, protesta qytetare hyn në ditën e 121 të saj

Protesta qytetare kundër qeverisë hyn sot në ditën e 121-të, pas një tjetër tubimi të zhvilluar të dielën në Tiranë, ku qytetarë dhe aktivistë u mblodhën fillimisht pranë Kryeministrisë dhe më pas vijuan me një marshim në rrugët e kryeqytetit.

Dita e 120-të u shoqërua me fjalime, pankarta, flamuj dhe flakadanë, ndërsa protestuesit përcollën një sërë mesazhesh kundër qeverisë dhe kërkuan ndryshime politike e institucionale.

Gjatë marshimit u dëgjuan thirrje të ndryshme, mes tyre “Edi Rama, jep dorëheqjen”, “Ju erdhi fundi”, “Arrestoni Ramën”, “Revolucion”, “Studentë bashkohuni, kombi na thërret” dhe “Poshtë narkoshteti”.

Një tjetër slogan i përsëritur ishte “Shqipëria nuk shitet”, ndërsa një pjesë e protestuesve u fokusuan te mobilizimi i të rinjve, përmes thirrjes “Pa rini nuk ka Shqipëri”.

Kërkesat e protestuesve

Dorëheqja e kryeministrit Edi Rama vijon të jetë një prej kërkesave kryesore të lëvizjes. Protestuesit kërkojnë gjithashtu krijimin e një qeverie tranzitore, ndërsa kundërshtojnë disa prej ligjeve dhe politikave të qeverisë, të cilat i konsiderojnë në kundërshtim me interesat e qytetarëve.

Pjesëmarrësit kanë deklaruar se lëvizja nuk do të ndalet me përmbushjen e 120 ditëve, duke paralajmëruar vijimin e protestave edhe në ditët në vazhdim.

Në protestën e së dielës foli edhe aktivisti Dritan Goxhaj, i cili u shpreh se nuk duhet të ketë tërheqje nga qëndrimi i protestuesve, por njëkohësisht kundërshtoi përdorimin e dhunës.

Sipas Goxhajt, përshkallëzimi i dhunshëm do t’i shërbente pushtetit, ndërsa protestuesit duhet të vijojnë qëndrimin paqësor. Ai e lidhi qëndresën me synimin për një Shqipëri që, sipas tij, të jetë e çliruar nga korrupsioni dhe nepotizmi.

“Jemi këtu jo sepse nuk jemi lodhur dhe nuk kemi zgjidhje tjetër, por besojmë në këtë Shqipëri”, deklaroi Goxhaj, duke e përshkruar lodhjen si pjesë të “çmimit të lirisë”.

Aktivisti ngriti gjithashtu shqetësime për funksionimin e institucioneve, policinë dhe sistemin shëndetësor. Ai kërkoi që drejtuesit e policisë të mos kenë lidhje me krimin dhe që qytetarët të kenë akses në shërbime shëndetësore funksionale.

“Knock-knock”, mesazhi simbolik ndaj Ramës

Një prej elementeve simbolike të protestës së 120-të ishte edhe një pankartë që ironizonte shprehjen “Noc Rrok”, të përdorur më herët nga kryeministri Edi Rama.

Në pankartë ishte shkruar “Knock-knock”, duke e kthyer shprehjen në një mesazh simbolik të protestuesve lidhur me kërkesat e tyre për drejtësi dhe përgjegjësi institucionale.

Krahas saj, gjatë tubimit u përsëritën edhe thirrjet për arrestimin e kryeministrit.

Hetimi ndaj ish-drejtores së SHISH, pjesë e mesazheve

Protesta e së dielës u zhvillua ndërkohë që debati publik ishte përqendruar edhe te zhvillimet rreth ish-drejtoreshës së Shërbimit Informativ të Shtetit, Vlora Hyseni, e cila ndodhet nën masën e sigurisë “arrest në shtëpi” në kuadër të hetimeve të SPAK.

Publikimi i materialeve të hetimit dhe çështjet që lidhen me informacionin e klasifikuar u përmendën edhe gjatë protestës, ndërsa pjesëmarrësit kërkuan që institucionet e drejtësisë të vijojnë hetimet dhe të përcaktojnë përgjegjësitë.

Në ditën e 120-të nuk munguan as mesazhet që lidhen me hetimet për AKSHI-n. Një prej pankartave iu drejtua drejtpërdrejt SPAK-ut me kërkesë për veprim, ndërsa gjatë marshimit u përsëritën thirrjet për hetimin dhe vënien para drejtësisë të zyrtarëve që protestuesit i konsiderojnë përgjegjës.

Me përfundimin e ditës së 120-të, protesta hyn sot në një tjetër fazë, atë të ditës së 121-të, ndërsa organizatorët dhe pjesëmarrësit kanë deklaruar se do të vijojnë tubimet në Tiranë.