Emërohet inxhinieri Andi Muhametaj

Drejtoria Rajonale e Kadastrës së Vlorës ka ndryshuar drejtuesin, në një moment kur institucioni përballet me problematika të vazhdueshme sa i takon regjistrimit të pronave, mbivendosjeve dhe konflikteve të krijuara ndër vite.

Në vend të Albion Koçit është emëruar Andi Muhametaj, një inxhinier që më herët ka mbajtur detyrën e drejtorit në Agjencinë Shtetërore të Kadastrës në strukturat qendrore, konkretisht në sektorin që mbulon zonat e stimuluara.

Burime pranë ASHK-së bëjnë me dije se vlerësimi për punën e tij dhe eksperienca profesionale kanë qenë ndër faktorët që kanë çuar në emërimin e Muhametajt në krye të një prej drejtorive më delikate të Kadastrës në vend.

Ndryshimi i drejtimit vjen në një periudhë kur problematikat me pronësinë në qarkun e Vlorës janë shtuar, veçanërisht për shkak të mbivendosjeve dhe rasteve kur dokumentacioni i pronave nuk përputhet me situatën faktike në terren.

Në këtë kuadër, pritet që fokusi i drejtimit të ri të jetë zhvendosja nga një qasje thjesht dokumentare drejt verifikimit praktik të pronave. Synimi është që regjistrimet të mos mbështeten vetëm te dokumentet e paraqitura, por të shoqërohen edhe me verifikime dhe matje konkrete në terren.

Prej kohësh, problematikat e pronësisë në Vlorë janë shoqëruar me pretendime për parcela të mbivendosura, regjistrime të përsëritura dhe konflikte mbi kufijtë e pronave. Kjo situatë ka krijuar jo pak paqartësi për qytetarët dhe pronarët që kërkojnë të formalizojnë pasuritë e tyre.

Ndërkohë, Agjencia Shtetërore e Kadastrës ka angazhuar grupe pune nga Tirana për të kryer matje në zonat bregdetare të qarkut. Ekipet po kryejnë verifikime në terren, përfshirë kontrolle derë më derë, ndërsa të dhënat e mbledhura pritet të përpunohen dhe të hidhen në hartat përkatëse.

Pikërisht verifikimi në terren dhe hartografimi i saktë pritet të jenë ndër prioritetet kryesore të drejtimit të ri të Kadastrës së Vlorës. Qëllimi është që të identifikohen pronat problematike dhe të shmangen interpretimet e ndryshme mbi kufijtë dhe sipërfaqet e pasurive.

Një tjetër problem që ka shoqëruar ndër vite administrimin e pronave në qark është edhe pretendimi për përvetësimin apo regjistrimin e sipërfaqeve që kanë qenë objekt konfliktesh pronësie. Në disa raste, problematikat kanë prekur edhe zona ranore apo territore pranë bregdetit, lumenjve dhe përrenjve, ku statusi i tokës është kthyer në burim konfliktesh të vazhdueshme.

Me emërimin e Andi Muhametajt, pritshmëria është që procesi i verifikimit të pronave problematike të kalojë në një fazë më teknike, ku matjet në terren dhe përputhja e tyre me dokumentacionin të shërbejnë si bazë për korrigjimin e situatave të krijuara ndër vite.

Në fokus pritet të jenë veçanërisht pronat me mbivendosje, zonat bregdetare dhe pasuritë për të cilat ekzistojnë mospërputhje mes dokumenteve të regjistrimit dhe gjendjes faktike.