Ironia “therëse” e Arlind Qorit: Askush nuk u ngrit mbi nivelin e kafshës

Kreu i Lëvizjes “Bashkë”, Arlind Qori, ka reaguar ashpër pas miratimit të Reformës Administrativo-Territoriale në Kuvend, duke vënë në shënjestër deputetët e Partisë Socialiste që, sipas tij, nuk shfrytëzuan rastin për t’i kundërshtuar politikisht kryeministrin Edi Rama.

Pavarësisht debateve dhe rezervave të shprehura nga disa përfaqësues të mazhorancës, reforma u miratua me 85 vota pro. Për Qorin, ky votim ishte një mundësi që të paktën një deputet socialist të shprehte me votë kundërshtimin ndaj mënyrës se si, sipas tij, Rama i trajton përfaqësuesit e forcës së tij politike.

Në një reagim të publikuar në Facebook, kreu i Lëvizjes “Bashkë” përdori gjuhë të ashpër për të përshkruar atë që e konsideron mungesë të guximit politik brenda radhëve të socialistëve.

“Sot ishte dita që të paktën një prej deputetëve të Partisë Socialiste t’i tregonte me votë Ramës: ‘Nuk pranoj më të më trajtosh si qen të rrahur.’ Askush nuk u ngrit politikisht mbi nivelin e kafshës. Sa turp për ta!”, shkruan Qori.

Reagimi i tij e zhvendos vëmendjen nga rezultati i votimit te raporti politik brenda mazhorancës, duke vënë në pikëpyetje nëse zërat kundër reformës ishin të gatshëm ta shndërronin pakënaqësinë në një qëndrim konkret në Kuvend.

REAGIMI I QORIT:

Sot ishte dita që të paktën një prej deputetëve të Partisë Socialiste t’i tregonte me votë Ramës: “Nuk pranoj më të më trajtosh si qen të rrahur.” Askush nuk u ngrit politikisht mbi nivelin e kafshës.
Sa turp për ta!