Revolta e studentëve, gjimnazistët e Korçës braktisin mësimin

Protesta e nxënësve dhe studentëve kundër qeverisë po merr përmasa të reja, duke u shtrirë edhe në qytete të tjera të vendit. Pas gjimnazistëve të Kamzës, të cilët nisën bojkotin e mësimit që në orët e para të mëngjesit, edhe nxënësit e shkollave të mesme në Korçë kanë braktisur klasat dhe kanë dalë në rrugët e qytetit.

Ndonëse tubimi në Korçë ishte njoftuar të niste në orën 11:00, gjimnazistët kanë vendosur të largohen më herët nga ambientet shkollore për t’iu bashkuar protestës.

Sipas pretendimeve të nxënësve, ky vendim u mor nga frika se mësuesit mund të mbyllnin dyert e shkollave gjatë pushimit të madh. Kjo frikë i ka shtyrë ata të dalin në rrugë përpara orarit të parashikuar.

Nxënësit e Kamëzës nisin bojkotin

Në Kamëz, nxënësit ishin të parët që nisën bojkotin e mësimit këtë të enjte. Me flamuj në duar dhe thirrjen “Të gjithë së bashku!”, ata dolën në rrugë dhe u bënë thirrje bashkëmoshatarëve të tjerë që t’i bashkohen mobilizimit.

Protesta zgjerohet në Korçë

Përfshirja e gjimnazistëve të Korçës shënon zgjerimin e protestës përtej Tiranës. Ndërsa reagimi i të rinjve vijon të marrë formë edhe jashtë kryeqytetit.

Protestat e mëparshme në Tiranë

Lëvizja vjen dy ditë pas protestave në Tiranë, ku nxënës të shkollave të mesme dhe studentë bojkotuan mësimin për t’iu bashkuar tubimeve kundër qeverisë.

Protestat e kësaj të enjteje sinjalizojnë vijimin e mobilizimit të të rinjve. Ndërkohë, pritet të shihet nëse bojkotit do t’i bashkohen edhe shkolla të tjera në Tiranë dhe në qytete të tjera të vendit.