Nga Brescia në Tiranë, emigranti: Nuk duam që të rinjtë të kenë fatin tonë

Një shqiptar që jeton në Brescia të Italisë ka udhëtuar drejt Tiranës për t’iu bashkuar protestës kundër qeverisë, duke shprehur shqetësimin për situatën në vend dhe largimin e vazhdueshëm të të rinjve drejt emigracionit.

Në një prononcim për mediat, ai tregoi se kishte mbërritur në Shqipëri mbrëmjen e kaluar, ndërsa sipas tij, pritet që protestës t’i bashkohen edhe emigrantë të tjerë. Megjithatë, ardhja e disa prej tyre është vështirësuar nga problemet me linjat e udhëtimit dhe radarët italianë.

Përtej vështirësive të organizimit, emigranti tha se arsyeja kryesore që e ka shtyrë të marrë pjesë në protestë është shqetësimi për të ardhmen e brezit të ri. Ai theksoi se të rinjtë shqiptarë nuk duhet të detyrohen të largohen nga vendi për të ndërtuar një jetë më të mirë, ashtu siç kanë bërë shumë qytetarë ndër vite.

“Nuk mund të rrimë kështu. Nuk duam që të rinjtë të kenë fatin tonë, që të detyrohen të ikin jashtë vendit. Shqipëria ka bërë hapa pas, pasi pretendohet që duhet të ishim shumë herë më mirë”, deklaroi ai.

Një tjetër shqetësim që ngriti shqiptari i ardhur nga Italia lidhet me koston e jetesës. Ai vuri në dukje çmimet e karburanteve dhe të produkteve ushqimore, duke kundërshtuar atë që e konsideron një kontrast të madh mes gjendjes ekonomike të vendit dhe shpenzimeve që përballojnë qytetarët.

“Nuk mundet që Shqipëria, si një nga vendet më të varfra të Europës, të ketë çmimin më të lartë të karburantit në Europë dhe çmimet e ushqimeve ndër më të lartat”, u shpreh ai.

Në fund të prononcimit, emigranti e përshkroi protestën si një mundësi vendimtare për të kërkuar ndryshim, ndërsa pranoi se nuk e di se si do të zhvillohen ngjarjet në vijim.

“Kjo është shpresa e fundit. Nuk e di çfarë do të ndodhë më!”, përfundoi ai.

Prania e shqiptarëve që jetojnë jashtë vendit në protestë sjell sërish në vëmendje shqetësimet e diasporës për emigracionin, fuqinë blerëse dhe perspektivën e të rinjve në Shqipëri.