Momente alarmante në protestë, qytetari shembet në tokë pa ndjenja

Një moment shqetësues është regjistruar në bulevardin “Dëshmorët e Kombit”, ku një qytetar është rrëzuar në asfalt gjatë përplasjeve mes protestuesve dhe policisë në Tiranë.

Qytetari është parë i shtrirë në tokë dhe, sipas pamjeve nga vendngjarja, nuk ka reaguar menjëherë. Pranë tij janë afruar qytetarë dhe gazetarë të pranishëm, të cilët janë përpjekur t’i japin ndihmën e parë.

Ngjarja është regjistruar në afërsi të Kryeministrisë, në një moment kur zona ishte mbushur me tym dhe gaz lotsjellës. Forcat e policisë po përdornin gaz lotsjellës dhe ujë me presion për të shpërndarë turmën, ndërsa situata në bulevard vijonte të ishte e tensionuar.

Pamjet tregojnë qytetarë që nxitojnë drejt personit të rrëzuar për ta ndihmuar, ndërkohë që përplasjet vazhdojnë në zonën përreth.

Deri në këto momente, nuk ka informacion të konfirmuar mbi identitetin e qytetarit, shkakun e saktë të rrëzimit apo gjendjen e tij shëndetësore.