KMSH reagon për protestat: Të shmanget dhuna dhe gjuha e urrejtjes

Përmes një deklarate publike, Komuniteti Mysliman i Shqipërisë ka shprehur shqetësimin për zhvillimet e fundit, duke vënë theksin te ruajtja e paqes sociale, siguria dhe bashkëjetesa mes qytetarëve.

KMSH nënvizon se e drejta për të protestuar, për të shprehur mendimin dhe për të kërkuar llogaridhënie nga institucionet është pjesë e rëndësishme e jetës demokratike. Megjithatë, sipas institucionit fetar, ushtrimi i këtyre të drejtave duhet të shoqërohet me përgjegjësi, respekt të ndërsjellë dhe kundërshtim të çdo forme dhune.

Në reagimin e saj, organizata fetare u bën thirrje institucioneve që të mos i trajtojnë në mënyrë sipërfaqësore kërkesat e qytetarëve, por t’u kushtojnë vëmendjen e duhur. Njëkohësisht, apelon për maturi nga të gjitha palët, duke kërkuar shmangien e deklaratave nxitëse, urrejtjes dhe veprimeve që mund të përkeqësojnë situatën.

KMSH: Pakënaqësitë të zgjidhen përmes dialogut

Komuniteti Mysliman thekson se, edhe kur mosmarrëveshjet janë të ndërlikuara, zgjidhja duhet kërkuar përmes komunikimit, dëgjimit të ndërsjellë dhe respektimit të ligjit.

Në këtë kontekst, KMSH u kujton palëve se përgjegjësia për ruajtjen e paqes nuk i takon vetëm institucioneve, por të gjithë aktorëve të shoqërisë, të cilët duhet të vlerësojnë pasojat që mund të sjellin fjalët dhe veprimet e tyre.

“Shqipëria është shtëpia e përbashkët e të gjithëve”, thekson KMSH në deklaratë, duke nënvizuar se dallimet politike dhe shoqërore nuk duhet të cenojnë respektin mes qytetarëve.

Sipas institucionit, paqja, dinjiteti njerëzor dhe e ardhmja e vendit janë vlera që duhet të bashkojnë shoqërinë përtej bindjeve dhe qëndrimeve të ndryshme.

Apeli për paqe shoqërohet me lutje për Shqipërinë

Në përfundim të reagimit, Komuniteti Mysliman i Shqipërisë rithekson përkushtimin e tij ndaj harmonisë fetare, mirëkuptimit dhe bashkëjetesës, duke bërë thirrje që dialogu të mbizotërojë mbi zemërimin dhe përplasjet.

KMSH shpreh gjithashtu lutjen që vendi të përballet me këtë periudhë me urtësi dhe qetësi, ndërsa drejtuesit, qytetarët dhe të gjithë aktorët shoqërorë të gjejnë rrugën drejt zgjidhjeve të drejta dhe paqësore.

Mesazhi i institucionit fetar vjen në një klimë të tensionuar, ku nevoja për dialog dhe trajtimi serioz i kërkesave qytetare mbeten çështje të rëndësishme për kapërcimin e situatës.

Deklarata e Komunitetit Mysliman Të Shqipërisë:

Komuniteti Mysliman i Shqipërisë po i ndjek me vëmendje zhvillimet e fundit në vend dhe protestat që po zhvillohen, duke shprehur shqetësimin për çdo situatë që mund të cenojë paqen sociale, sigurinë dhe bashkëjetesën mes qytetarëve.

Ne besojmë se e drejta për t’u shprehur, për të protestuar dhe për të kërkuar llogaridhënie është pjesë e rëndësishme e jetës shoqërore, ndërsa ruajtja e paqes, respekti ndaj tjetrit dhe shmangia e çdo forme dhune janë përgjegjësi e përbashkët e të gjithëve.

Në këto momente, nevojiten reflektim i sinqertë, urtësi dhe përgjegjësi nga të gjithë, për të vlerësuar pasojat e fjalëve dhe veprimeve tona mbi jetën e përbashkët. U bëjmë thirrje institucioneve t’u përgjigjen me seriozitet kërkesave të qytetarëve dhe të gjitha palëve të tregojnë vetëpërmbajtje, maturi dhe përgjegjësi, duke shmangur gjuhën nxitëse, urrejtjen dhe çdo veprim që mund të thellojë përçarjen mes qytetarëve, duke vendosur dinjitetin njerëzor, sigurinë dhe të mirën e vendit në qendër të çdo vendimmarrjeje.

Çdo mosmarrëveshje, sado e ndërlikuar të jetë, duhet të kërkojë zgjidhje përmes dialogut, dëgjimit të ndërsjellë dhe respektimit të ligjit e institucioneve.

Shqipëria është shtëpia e përbashkët e të gjithëve. Dallimet në qëndrime dhe bindje nuk duhet të na largojnë nga njëri-tjetri, por të na kujtojnë se paqja, dinjiteti njerëzor dhe e ardhmja e vendit janë vlera që na bashkojnë përtej çdo dallimi politik apo shoqëror.

Si institucion fetar, Komuniteti Mysliman i Shqipërisë mbetet i përkushtuar ndaj paqes, harmonisë, mirëkuptimit dhe bashkëjetesës. Ne besojmë se fjala e urtë është më e fortë se zemërimi, se dialogu është më frytdhënës se përplasja dhe se përgjegjësia ndaj së mirës së përbashkët duhet të udhëheqë çdo veprim.

Në këto ditë, lutemi që Zoti i Madhëruar t’i japë vendit tonë qetësi e urtësi, t’i udhëzojë të gjithë drejt së mirës, t’u dhurojë zemrave paqe e mirëkuptim dhe t’i ndihmojë drejtuesit, qytetarët dhe të gjithë aktorët e shoqërisë të gjejnë rrugën e dialogut dhe të zgjidhjeve të drejta.

Zoti e ruajtë Shqipërinë, i mbrojtë qytetarët e saj dhe na udhëzoftë të gjithëve drejt paqes, drejtësisë dhe së mirës së përbashkët. Amin!

Komuniteti Mysliman i Shqipërisë