Belinda Balluku del nga SPAK-u, “kyç” gojën para gazetarëve

Ish-zëvendëskryeministrja Belinda Balluku është paraqitur këtë të martë në Prokurorinë e Posaçme (SPAK), në kuadër të hetimeve që po zhvillohen ndaj saj. Gjatë qëndrimit në institucion, ajo shoqërohej nga avokati i saj, Ardian Kalia.

Në përfundim të takimit, ishte avokati ai që konfirmoi për mediat se hetimet do të vijojnë përtej afateve të mëparshme. “Jemi në fazë të hetimeve. Do të ketë dhe një zgjatje të hetimeve”, u shpreh Kalia.

Balluku nuk bën koment për gazetarët

Ndërkohë, Balluku zgjodhi të mos bëjë asnjë koment për gazetarët që e prisnin jashtë godinës së SPAK. Ajo nuk iu përgjigj pyetjeve dhe u fut me shpejtësi në automjetin e saj, duke u larguar nga institucioni.

Nga Tuneli i Llogarasë te Unaza e Madhe, hetimet për tenderat

Çështja ndaj Ballukut lidhet me dyshime për shkelje në procedurat e prokurimit publik, ku përfshihen tenderi për ndërtimin e Tunelit të Llogarasë, disa lote të Unazës së Madhe të Tiranës dhe procedura të tjera. Sipas të dhënave të bëra publike, hetimet përfshijnë të paktën tetë raste të dyshuara.

Akuzat dhe pikat e hetimit

Në kuadër të çështjes, ndaj ish-zëvendëskryeministres janë ngritur akuza që lidhen me shkeljen e barazisë së pjesëmarrësve në tendera dhe korrupsionin pasiv të funksionarëve të lartë shtetërorë. Hetimet përfshijnë gjithashtu dyshime për përfitime të paligjshme në procedura publike, përfshirë periudhën kur ajo drejtonte Albcontrol.

Pasuria dhe pastrimi i parave

Një tjetër pistë e hetimit lidhet me dyshime për pastrim të produkteve të veprës penale dhe çështje të deklarimit të pasurisë, përfshirë pasuri të paluajtshme dhe vila në zona bregdetare.

Zgjatja e afateve i jep SPAK-ut kohë shtesë për vijimin e veprimeve hetimore dhe administrimin e provave. Çështja mbetet në fazën e hetimit, ndërsa përgjegjësia penale e të pandehurve përcaktohet përfundimisht vetëm nga një vendim gjyqësor i formës së prerë.