Kolë Laca në krah të studentëve: Pa dorëheqjen e Ramës nuk tërhiqemi

Muzikanti Kolë Laca, pjesë e grupit “Shkodra Elektronike”, ka shprehur publikisht mbështetjen për protestën e studentëve kundër qeverisë së Edi Ramës, duke vlerësuar guximin dhe mënyrën se si të rinjtë po artikulojnë kërkesat e tyre.

Përmes një videomesazhi të publikuar në rrjetet sociale, Laca u është bashkuar zërave që mbështesin protestuesit, të cilët kërkojnë dorëheqjen e kryeministrit. Ai u bëri thirrje qytetarëve të tregojnë solidaritet me studentët dhe theksoi se shembulli i tyre duhet të tërheqë vëmendjen edhe në Evropë.

Duke iu referuar një interviste të një studenti për News24, muzikanti vlerësoi aftësinë e të rinjve për të shprehur qëndrimet e tyre, si dhe vendosmërinë për të vijuar protestën pavarësisht situatës së krijuar gjatë tubimeve.

“Pa dorëheqjen e kryeministrit ne nuk tërhiqemi”, u shpreh Laca, duke përcjellë mesazhin e protestuesve dhe duke vënë theksin te kërkesa e tyre politike.

Ai ngriti gjithashtu shqetësimin për përdorimin e gazit lotsjellës dhe ujit nga policia gjatë protestave, duke thënë se kjo situatë mund ta vështirësojë pjesëmarrjen e qytetarëve, por se të rinjtë kanë treguar vendosmëri për të mos u tërhequr.

“Është një protestë në Shqipëri që, sinqerisht, nuk më vjen me thënë se kush e çon Shqipërinë në Evropë. Evropa duhet me ardhur këtu e me mësuar prej nesh”, deklaroi muzikanti.

Mesazhi i Kolë Lacës vjen në ditën e nëntë të protestës studentore, e cila është mbështetur edhe nga pedagogë që kanë nisur bojkotin e mësimdhënies në universitetet publike. Protestuesit vijojnë të kërkojnë largimin e Ramës, ndërsa refuzimi i ftesës së tij për dialog ka shënuar një tjetër zhvillim në përplasjen mes studentëve dhe qeverisë.