Kongresmeni amerikan: Thellësisht i shqetësuar për dhunën e policisë në Tiranë

Kongresmeni amerikan Ritchie Torres ka reaguar lidhur me situatën e krijuar gjatë protestave në Shqipëri, duke ngritur shqetësimin për përdorimin e dhunës ndaj protestuesve dhe duke kërkuar që situata të shtensionohet.

Në deklaratën e tij, Torres i cilëson të papranueshme veprimet e Policisë së Shtetit ndaj protestuesve dhe kërkon që ato të marrin fund. Ai thekson se qytetarët shqiptarë kanë të drejtë të protestojnë në mënyrë paqësore dhe se kjo e drejtë duhet të respektohet nga autoritetet.

Sipas kongresmenit amerikan, policia ka përgjegjësinë të garantojë respektimin e të drejtave të qytetarëve, duke vepruar në përputhje me ligjin dhe parimet e shtetit të së drejtës.

Torres kërkon gjithashtu uljen e tensioneve, me qëllim ndalimin e episodeve të dhunshme dhe shmangien e përshkallëzimit të mëtejshëm të situatës.

Reagimi i plotë i Ritchie Torres

“Jam thellësisht i shqetësuar nga shpërthimi i dhunës ndaj protestuesve në Shqipëri. Veprimet e ndërmarra nga Policia Shqiptare janë të papranueshme dhe duhet të marrin fund. Shqiptarët kanë të drejtë të protestojnë në mënyrë paqësore, policia duhet të respektojë të drejtën e protestuesve për të protestuar dhe duhet të garantojë zbatimin e shtetit të së drejtës. Situata duhet të shtensionohet për t’i dhënë fund dhunës alarmante.”