Një aksident me pasojë vdekjen është regjistruar pasditen e sotme në zonën e Fllakës, në Durrës. Ngjarja e rëndë ka ndodhur në aksin rrugor Fllakë–Bisht Kamëz, ku një automjet tip Volkswagen, i drejtuar nga një 16-vjeçar, ka përplasur për vdekje një këmbësor.
Sipas burimeve paraprake, viktima ka ndërruar jetë në vend si pasojë e goditjes së fortë. Identiteti i tij nuk është bërë ende publik nga autoritetet.
Adoleshenti që drejtonte mjetin, i cili nuk posedonte leje drejtimi, nuk ka pësuar lëndime nga aksidenti dhe ndodhet tashmë në pranga. Grupi hetimor vijon punën për të zbardhur rrethanat e plota të kësaj ngjarjeje.
Burime nga policia bëjnë me dije se në kuadër të hetimeve janë kontrolluar edhe zona pranë vendit të ngjarjes, për të përjashtuar mundësinë e përfshirjes së personave të tjerë apo dëmtimeve shtesë.
Ky rast ka rindezur alarmin mbi drejtimin e automjeteve nga persona të mitur dhe mungesën e kontrollit efektiv në disa zona të vendit, një fenomen që rrezikon sigurinë publike dhe jetën e qytetarëve.
