Aksion kundër trafikut të armëve, arrestohet 48-vjeçari (VIDEO)

Një operacion i Policisë së Shtetit ka çuar në arrestimin e një 48-vjeçari në Tiranë, i dyshuar për përfshirje në trafik armësh zjarri.

Në pranga ka rënë Ligor Mehmet, i cili u kap në flagrancë ndërsa transportonte armë me automjet, me dyshimin se do t’i shiste në zonat e Freskut dhe Tufinës.

Sipas njoftimit zyrtar, operacioni i koduar “Barriera”, i zhvilluar nga Komisariati i Policisë Nr. 4, goditi një rast konkret të tentativës për shitje armësh. Gjatë ndërhyrjes, efektivët ndaluan automjetin e 48-vjeçarit në rrugën “Myslym Keta”, në zonën e Tufinës.

Nga kontrolli i ushtruar në mjet, u zbuluan dhe sekuestruan tre armë zjarri: dy pistoleta dhe një armë taktike luftarake. Sipas hetimeve paraprake, këto armë dyshohet se mbaheshin me qëllim shitjen në tregun e paligjshëm.

Në cilësinë e provës materiale, policia ka sekuestruar gjithashtu tre krehra me municion, automjetin që përdorte i arrestuari, si dhe telefonin celular të tij.

Operacioni u realizua pas informacioneve të siguruara në rrugë operative për një rast të posedimit të armëve me qëllim trafikimin e tyre.

Nën drejtimin e Prokurorisë së Tiranës, hetimet vijojnë për të identifikuar dhe persona të tjerë që mund të jenë të përfshirë në këtë aktivitet të paligjshëm.

Materialet procedurale i janë referuar organit të akuzës për veprime të mëtejshme ligjore.

Njoftimi i policisë;

Finalizohet operacioni i koduar “Barriera”. Goditet një rast i tentativës për të shitur armë zjarri.

Sekuestrohen 3 armë zjarri (2 pistoleta dhe 1 armë taktike luftarake).

Arrestohet 48-vjeçari Ligor Mehmet që i posedonte armët, me qëllim shitjen.

Ai u kap në flagrancë, në Tufinë, duke i transportuar armët, me automjet.

Në bazë të informacioneve të siguruara për një rast të posedimit të armëve të zjarrit, me qëllim shitjen, shërbimet e Komisariatit të Policisë Nr. 4 finalizuan operacionin e koduar “Barriera”.

Gjatë operacionit, u vu në pranga shtetasi L. M.,  48 vjeç, banues në Tiranë.

Ky shtetas u ndalua nga shërbimet e Policisë, në rrugën “Myslym Keta”, Tufinë, ndërkohë që lëvizte me automjetin e tij.

Nga kontrollet në automjet, u gjetën 3 armë zjarri (2 pistoleta dhe 1 armë taktike luftarake), që dyshohet se ky shtetas i posesonte me qëllim shitjen në zonat “Fresku” dhe “Tufinë”.

Armët e zjarrit u sekuestruan në cilësinë e provës materiale, bashkë me 3 krehra me municion, automjetin që drejtonte shtetasi L. M. dhe celularin e tij.

Në drejtimin e Prokurorisë, vijojnë hetime për të nxjerrë përpara përgjegjësisë penale, shtetas të tjerë që mund të jenë përfshirë në këtë rast.

Materialet procedurale iu referuan Prokurorisë së Tiranës, për veprime të mëtejshme.