Ambasadorja e BE-së në Shqipëri merr zyrtarisht detyrën

Ambasadorja e re e Bashkimit Evropian në Shqipëri, Sofia Moreira de Sousa, pritet të dorëzojë sot kredencialet e saj te Presidenti i Republikës, Bajram Begaj.

Ceremonia zyrtare është parashikuar të zhvillohet në orën 09:30, në kuadër të marrjes së detyrës së re nga diplomatja portugeze.

Moreira de Sousa do të pasojë në këtë post diplomatin italian Silvio Gonzato, i cili ka përfaqësuar Bashkimin Evropian në Shqipëri.

Diplomatja portugeze vjen në Tiranë me një përvojë të gjatë në institucionet dhe shërbimin diplomatik evropian. Përpara emërimit si ambasadore e BE-së në Shqipëri, ajo ka mbajtur detyrën e Drejtuese së Përfaqësisë së Komisionit Evropian në Portugali.

Në karrierën e saj diplomatike, Moreira de Sousa ka shërbyer gjithashtu si Ambasadore e Bashkimit Evropian në Kepin e Gjelbër.

Marrja e detyrës në Tiranë e vendos atë në krye të përfaqësimit diplomatik të BE-së në një periudhë të rëndësishme për procesin e integrimit të Shqipërisë në Bashkimin Evropian.