Apeli lë në burg ish-drejtoreshën e Postës Durrës, Elisabeta Mataj

Gjykata e Apelit ka lënë në fuqi masën e sigurisë “arrest në burg” për ish-drejtoreshën e Postës Shqiptare në Durrës, Elisabeta Mataj, e cila dyshohet se është përfshirë në vjedhjen e afro 700 milionë lekëve.

Bëhet fjalë për fonde që ishin parashikuar për pagesat e pensionistëve në qytetin e Durrësit, si dhe për qytetarët që përfitojnë ndihmë ekonomike.

Sipas raportimeve, Apeli ka lënë gjithashtu në fuqi masën “arrest shtëpie” për dy ish-vartëse të Matajt: ish-arkëtaren Paola Danaj dhe ish-shefen e financës, Valbona Duni.

Të treja dyshohet se kanë qenë të përfshira në skemën për përvetësimin e fondeve, ndërsa hetimet vijojnë për të zbardhur plotësisht mënyrën se si janë marrë paratë dhe përgjegjësitë konkrete të secilës prej të dyshuarave.

Vendimi i Gjykatës së Apelit vjen pas ankimit ndaj masave të sigurisë të caktuara më herët, ndërsa hetimi për ngjarjen vijon.