Rrëzohet vendimi i Shkallës së Parë

Gjykata e Apelit në Fier ka shpallur të pafajshëm këngëtarin e njohur Luiz Ejlli, duke rrëzuar vendimin e mëparshëm të Gjykatës së Shkallës së Parë, e cila e kishte dënuar me një vit burg.

Trupa gjykuese e përbërë nga Brikena Lubonja, Dritan Hasani dhe Genti Shala, ka pranuar kërkesën ankimore të paraqitur nga avokatët mbrojtës të Ejllit, Arbër Hoxha dhe Dritan Metani, duke konstatuar se nuk kishte prova të mjaftueshme për fajësinë e të pandehurve.

Bashkë me Ejllin, është shpallur i pafajshëm edhe Fatmir Abdurramani, i cili më parë ishte dënuar me 18 muaj burg. Të dy u akuzuan për veprën penale “Falsifikimi i dokumenteve”, kryer në bashkëpunim.

Sipas akuzës, Luiz Ejlli – në një periudhë kur nuk ushtronte më profesionin e noterit dhe i ishte hequr licenca nga Ministria e Drejtësisë – kishte përdorur vulat e noterit për të hartuar një deklaratë me të dhëna të pavërteta. Kjo deklaratë, e nënshkruar në bashkëpunim me Abdurramanin, ishte dorëzuar më 25 shkurt 2022 në ish-Prokurorinë e Lushnjës për të justifikuar burimin e dyshimtë të pasurisë së Abdurramanit, e lidhur sipas prokurorisë me aktivitete kriminale.

Por Apeli vlerësoi se provat nuk ishin të mjaftueshme për të vërtetuar përgjegjësinë penale të Ejllit dhe Abdurramanit, duke i shpallur përfundimisht të pafajshëm.

Ky vendim mbyll përfundimisht një kapitull të zgjatur gjyqësor për artistin e njohur, i cili vijon të gëzojë mbështetjen e gjerë të publikut.