Nga burri sekser tek vartëset zare që gllabërojnë miliardat publike

Rrjeti i abuzimeve me tenderët publikë po merr përmasa shqetësuese, teksa në qendër të akuzave vendoset drejtuesja e Operatorit të Blerjeve të Përqendruara (OBP), Arlinda Pogaj. Denoncimet e publikuara së fundmi e paraqesin atë si figurë kyçe në një skemë të dyshuar manipulimi të procedurave tenderuese, ku përfshihen ndërmjetësime, paracaktim fituesish dhe përfitime të konsiderueshme financiare.

Sipas këtyre pretendimeve, një rol të rëndësishëm në këtë rrjet luan bashkëshorti i saj, Edigen Pogaj, i cili dyshohet se vepron si ndërmjetës mes biznesit dhe institucionit që drejton e shoqja. Ai thuhet se kontakton operatorë ekonomikë dhe negocion kushtet e përfitimit të tenderëve, duke vendosur edhe përqindjet që bizneset duhet të paguajnë në këmbim të favoreve. Takimet, sipas burimeve, zhvillohen në zona të ndryshme të Tiranës, larg syrit të publikut, por mjaftueshëm pranë strukturave që lidhen me aktivitetin e tij profesional.

Pas këtij hapi, në skemë përfshihen edhe bashkëpunëtoret e afërta të drejtoreshës, të cilat dyshohet se kanë rol në përgatitjen e dokumentacionit dhe kritereve të tenderëve. Emra si Mirela Zholi dhe Entela Postoli përmenden si hallka që përshtasin kushtet teknike sipas kërkesave të kompanive të paracaktuara për të fituar. Një nga rastet e përfolura lidhet me një tender me vlerë miliona euro për automjetet e Policisë së Shtetit, ku kriteret dyshohet se janë ndërtuar për të favorizuar një subjekt të caktuar.

Në vijim të zinxhirit, një tjetër figurë e përmendur është Erion Shtylla, i cili sipas akuzave luan rol vendimtar në fazën përmbyllëse të procedurave, duke ndikuar në vlerësimin dhe certifikimin e tyre. Pretendohet se ai ka ndikim edhe në përzgjedhjen e anëtarëve të komisioneve, duke garantuar kështu mbarëvajtjen e një procesi të kontrolluar nga fillimi në fund.

Përmasat e akuzave dhe emrat e përfshirë e bëjnë këtë çështje potencialisht një nga skandalet më të mëdha të abuzimit me fondet publike. Nëse verifikohen, ato mund të çojnë përpara drejtësisë një rrjet të tërë zyrtarësh dhe bashkëpunëtorësh të dyshuar për korrupsion të strukturuar.