Arrestimi i Ballukut, kërkesa re e SPAK mbërrin në Kuvend

SPAK ka dërguar në Kryesinë e Kuvendit kërkesën e dytë për heqjen e imunitetit të deputetes Belinda Balluku, ndonëse Kuvendi nuk e shpall publikisht nisjen e procedurave të kërkuara dhe mospengimin e drejtësisë. Krahas masës për ndalimin e daljes jashtë shtetit, SPAK pritet të rikërkojë arrest me burg për të pandehurën Balluku.

Korrupsioni, pastrimi i produkteve të veprës penale dhe kryerja e veprave në kuadër të grupit të strukturuar kriminal janë akuzat e reja të Strukturës së Posaçme. Sigurisht, materialit i bashkëngjitet edhe lënda ekzistuese, ku përfshihet akuza për shkeljen e barazisë në tendera. Këshilli i Rregullores, Mandateve dhe Imuniteteve duhet të marrë kërkesën dhe, pas njohjes me dosjen e re, të hapë seancën me të pandehurën e të dërgojë sa më shpejt raportin propozues për heqjen e mandatit në seancë plenare.

Kërkesa e parë u zvarrit dhe u refuzua nga mazhoranca socialiste me urdhër të Edi Ramës. Kjo solli edhe një raport radikal të IBAR, ku refuzimi i heqjes së mandatit të pandehurës Belinda Balluku u cilësua si pengim i drejtësisë.

Në hetimet e zgjeruara, prokuroria ka shtrirë veprimet dhe kontrollet e shumta te bashkëpunëtorët, familjarët e Ballukut, por edhe te biznesmenët. Kujtojmë javën e shkuar sekuestrimin e një vile në Dhërmi, marrjen të pandehur të Igli Tares, si dhe hetimin e Pandeli Carapulit nën akuzën e pastrimit të parave.

Kjo dosje shkon me veprime hetimore detyrimisht te kryeministri Edi Rama. Përgjimet e mesazheve nxjerrin zbuluar edhe përfshirjen e kryeministrit në favore ekonomike për disa tendera e shërbime në adresë të biznesmenëve klientë të tij.

Brukseli dhe Uashingtoni e kanë cilësuar të panegociueshme pavarësinë e drejtësisë dhe mosndikimin e qeverisë e të KM, duke u shprehur me emër për ish-zëvendëskryeministren tashmë të pandehur. Beteja e presioneve me përgjime mes numrit një dhe dy të qeverisë, Ramës dhe Ballukut, është përplasja e madhe kundër SPAK. Ndërkohë, Struktura e Posaçme ka edhe kërkesa të tjera nëpër duar.