Dërgon naftë bruto me vlerë 2 miliardë dollarë

Caracasi dhe Uashingtoni kanë arritur një marrëveshje të re për eksportin e naftës bruto drejt Shteteve të Bashkuara, me një vlerë që mund të arrijë deri në 2 miliardë dollarë. Lëvizja vjen vetëm pak ditë pas një operacioni ushtarak në Venezuelë, i cili përfundoi me arrestimin e Nicolás Maduro-s dhe bashkëshortes së tij, duke shënuar një kthesë të fortë në marrëdhëniet mes dy vendeve.

Marrëveshja parashikon ridrejtimin e dërgesave të naftës që më herët ishin planifikuar për tregun kinez, duke i hapur rrugë furnizimit të drejtpërdrejtë të SHBA-së. Ky zhvillim pritet të ndihmojë Venezuelën të shmangë një rënie më të thellë të prodhimit, në një moment kritik për industrinë e saj energjetike.

Sipas burimeve të Reuters, marrëveshja reflekton qartë presionin e administratës Trump për hapjen e sektorit të naftës venezueliane ndaj kompanive amerikane. Në të kundërt, Uashingtoni kishte paralajmëruar përshkallëzim të mëtejshëm të ndërhyrjes ushtarake. Vetë presidenti Donald Trump ka deklaruar se qeveria e përkohshme, e drejtuar nga Delcy Rodríguez, duhet t’u garantojë SHBA-së dhe sektorit privat amerikan akses të plotë në industrinë energjetike të vendit.

Trump ka pohuar se Venezuela disponon dhjetëra milionë fuçi naftë të ngarkuara në tankerë dhe depo, të cilat nuk mund të eksportoheshin për shkak të embargos amerikane të vendosur nga mesi i dhjetorit. Sipas tij, nga 30 deri në 50 milionë fuçi nën sanksione do t’i dorëzohen SHBA-së, ndërsa të ardhurat nga shitja do të administrohen nën kontrollin amerikan.

“Kjo naftë do të shitet me çmimin e tregut dhe fondet do të menaxhohen për të garantuar se shërbejnë interesave të popullit të Venezuelës dhe të Shteteve të Bashkuara,” shkroi Trump në rrjetin Truth Social.

Zbatimi i marrëveshjes do të mbikëqyret nga sekretari amerikan i Energjisë, Chris Wright. Nafta do të shkarkohet nga tankerët dhe do të transportohet drejtpërdrejt në portet amerikane. Fillimisht, procesi pritet të kërkojë riorganizim të dërgesave që ishin destinuar për Kinën, e cila ka qenë blerësi kryesor i naftës venezueliane gjatë dekadës së fundit, veçanërisht pas sanksioneve të vitit 2020.

Një burim nga industria e naftës i tha Reuters se Trump synon ta finalizojë marrëveshjen sa më shpejt, për ta paraqitur atë si një fitore të madhe politike dhe ekonomike.

Aktualisht, eksportet e naftës venezueliane drejt SHBA-së kontrollohen pothuajse tërësisht nga kompania Chevron, partneri kryesor i PDVSA-së, përmes autorizimeve të veçanta amerikane. Chevron po eksporton çdo ditë mes 100 mijë dhe 150 mijë fuçi naftë dhe është kompania e vetme që ka vijuar transportin pa ndërprerje javët e fundit.

Megjithatë, mbetet e paqartë mënyra se si Venezuela do të përfitojë realisht nga të ardhurat, pasi PDVSA vazhdon të jetë e përjashtuar nga sistemi financiar global dhe nuk ka akses në transaksione në dollarë amerikanë. Për këtë arsye, autoritetet e të dy vendeve kanë nisur diskutime për mekanizma alternativë shitjeje, përfshirë ankande për blerës amerikanë dhe lëshimin e lejeve të reja për partnerët e PDVSA-së.

Gjithashtu, është hedhur ideja që nafta venezueliane të përdoret në të ardhmen për Rezervat Strategjike të Naftës të SHBA-së, edhe pse për këtë opsion ende nuk ka një qëndrim zyrtar nga presidenti amerikan.