ARRSH hap tender për 6 mbikalime në autostradën Tiranë–Durrës

Gjashtë mbikalime të reja për këmbësorët pritet të ndërtohen në segmentin hyrës të autostradës Tiranë–Durrës, në kuadër të ndërhyrjeve shtesë që pasojnë zgjerimin e këtij aksi kryesor rrugor.

Projekti është vënë në lëvizje nga Autoriteti Rrugor Shqiptar, me synimin për të rritur ndjeshëm sigurinë dhe aksesin për banorët që jetojnë përgjatë kësaj autostrade me trafik të lartë. Ndërtimi i mbikalimeve do të krijojë pika të dedikuara kalimi, duke reduktuar ndjeshëm rrezikun nga kalimet e pakontrolluara të këmbësorëve.

Procedura e tenderimit është aktualisht në zhvillim dhe pritet të përfundojë më 15 qershor. Menjëherë pas shpalljes së kompanisë fituese, do të nisë zbatimi i projektit në terren.

Përveç ndërtimit të mbikalimeve, projekti përfshin edhe një sërë ndërhyrjesh plotësuese si instalimi i ndriçimit rrugor, gjelbërimi i zonave përreth, vendosja e barrierave akustike dhe masa të tjera që përmirësojnë cilësinë e jetesës për komunitetin.

Sipas planifikimit, mbikalimet do të vendosen në pika strategjike përgjatë autostradës: një pranë zonës së VEKO Group, një tjetër në afërsi të Universitetit Polis për t’i shërbyer zonës së Yrshekut, si dhe të tjera pranë QTU-së, BRUNES, objektit të FedEx Albania dhe Autostar.

Gjatë një inspektimi në terren, ministri i Infrastrukturës dhe Energjisë, Enea Karakaçi, theksoi se garantimi i aksesit të sigurt për banorët është një ndër prioritetet kryesore të këtij projekti.

Sipas afateve të parashikuara, punimet pritet të përfundojnë brenda muajit shtator, me synimin që mbikalimet të jenë funksionale në kohë për nisjen e vitit të ri shkollor.