Presidenti amerikan Donald Trump ka rikthyer në qendër të vëmendjes një tjetër deklaratë që ka ngjallur polemika, duke sulmuar publikisht homologun e tij francez Emmanuel Macron gjatë një fjalimi të mbajtur të mërkurën.
Në fjalën e tij, Trump u shpreh se Macron “po keqtrajtohet nga gruaja e tij dhe mezi po shërohet”, një koment që u interpretua gjerësisht si ironik dhe provokues. Ai iu referua një episodi të ndodhur në maj të vitit 2025, gjatë një vizite në Azinë Juglindore, ku bashkëshortja e presidentit francez, Brigitte Macron, ishte përfshirë në një moment që u komentua gjerësisht në media.
Gjatë të njëjtit fjalim, presidenti amerikan zbuloi edhe një bisedë që kishte zhvilluar me Macron lidhur me situatën e tensionuar në Ngushticën e Hormuzit, një pikë kyçe për qarkullimin global të naftës dhe gazit. Sipas Trump, ai i kishte kërkuar Francës mbështetje konkrete ushtarake për të garantuar sigurinë në rajon.
“Emmanuel, do të na duhej ndihmë në Gjirin Persik, edhe nëse i eliminojmë të këqijtë dhe shkatërrojmë raketat balistike. A mund të dërgoni menjëherë disa anije luftarake?”, citohet të ketë thënë ai.
Më pas, gjatë një konference për shtyp në Shtëpinë e Bardhë, Trump shprehu hapur pakënaqësinë e tij për reagimin e aleatëve evropianë, duke lënë të kuptohet se mbështetja ndaj SHBA-së në momente kritike nuk është në nivelin e pritur.
Ai deklaroi se shumë vende kishin premtuar angazhim vetëm pas përfundimit të konflikteve, duke shtuar me tone kritike: “Shumë prej tyre thanë: ‘Do të jemi atje sapo të mbarojë lufta’. Kështu e zbulova NATO-n. NATO nuk do të jetë atje nëse ndonjëherë kemi një krizë të madhe.”
Këto qëndrime përforcojnë linjën e njohur të kritikës së Trump ndaj aleatëve evropianë, të cilët ai i konsideron shpesh si tepër të varur nga Shtetet e Bashkuara për garantimin e sigurisë dhe mbrojtjes.
