Atentat i dështuar ndaj Mir Bitocit në Elbasan, policia arreston autorin

Pamjet e kamerave të sigurisë kanë dokumentuar momentet e një tentative vrasjeje të ndodhur mesditën e kësaj të shtune në Elbasan, ku shënjestër ishte Ermir Bitoci, i njohur gjithashtu si Ermir Kërtezi.

Ngjarja ka ndodhur rreth orës 14:50, në ambientet e një lokali ku në atë moment ndodheshin edhe qytetarë të tjerë.

Në pamjet e sigurisë dallohet autori i dyshuar teksa qëndron fillimisht në një tavolinë, në shoqërinë e një gruaje. Në një pjesë tjetër të lokalit ndodhet Bitoci, i cili pas disa çastesh ngrihet dhe largohet nga ambienti.

Pak sekonda më vonë, personi i veshur me bluzë të bardhë ngrihet nga tavolina dhe del pas tij.

Ngjarja merr një tjetër përmasë jashtë lokalit. I dyshuari i afrohet Bitocit nga pas dhe i drejton një pistoletë në pjesën e pasme të kokës.

Në momentin kur arma i drejtohet në kokë, Bitoci duket se e kupton rrezikun dhe reagon menjëherë. Sipas të dhënave paraprake, ai arrin t’i shmanget autorit të dyshuar dhe largohet me vrap nga vendi i ngjarjes.

Dyshohet se arma e zjarrit është bllokuar në momentin e tentativës, duke bërë që autori të mos mund të qëllonte ndaj shënjestrës.

Pas ngjarjes, Policia e Elbasanit ka arrestuar autorin e dyshuar të atentatit të dështuar. Hetimet vijojnë për të zbardhur rrethanat e plota të ngjarjes, motivin dhe nëse ka persona të tjerë të përfshirë.

Tentativa e vrasjes ndodhi në një ambient publik dhe në prani të disa qytetarëve, duke e bërë edhe më të rëndë situatën e krijuar.

Ermir Bitoci, i njohur edhe si Ermir Kërtezi, mësohet se jeton prej vitesh jashtë Shqipërisë. Emri i tij është përmendur në lidhje me trazirat dhe episodet kriminale të periudhës 1997–2000 në Elbasan.

Autoritetet pritet të verifikojnë të shkuarën e tij, lidhjet e mundshme dhe konfliktet që mund të kenë çuar në organizimin e atentatit, ndërsa një nga pistat kryesore të hetimit mbetet identifikimi i motivit dhe bashkëpunëtorëve të mundshëm.