Atentat ndaj vëllait të Fabio Dushkut, tre persona në pranga

Policia greke ka zbardhur një ngjarje të rëndë të ndodhur në janar 2025 në Selanik, ku një 32-vjeçar shqiptar u sulmua me armë zjarri. Tre shtetas shqiptarë janë arrestuar si të dyshuar për përfshirjen në tentativën e vrasjes, ndërsa viktima e sulmit është shpallur gjithashtu në kërkim.

Një operacion i zhvilluar në orët e para të së mërkurës në Selanik ka çuar në arrestimin e tre shtetasve shqiptarë, të cilët dyshohen se janë të përfshirë në një ngjarje me armë zjarri të regjistruar më 8 dhe 9 janar 2025.

Operacioni u zhvillua nga strukturat e Policisë greke që hetojnë krimet kundër jetës dhe pronës, në bashkëpunim me shërbimet e inteligjencës dhe veprimeve speciale, në zbatim të urdhër-arresteve të lëshuara për tre të dyshuarit.

Të arrestuarit janë Robert Elezaj, 33 vjeç, Sergo Elezaj, 31 vjeç dhe Rueldi Dragjoshi, 26 vjeç. Ata akuzohen për tentativë vrasjeje ndaj 32-vjeçarit Danjel Dushku, i cili, sipas autoriteteve greke, është shpallur gjithashtu person në kërkim.

Si ndodhi sulmi në Selanik

Sipas të dhënave të policisë greke, ngjarja ndodhi gjatë mbrëmjes së 8-9 janarit 2025, kur tre të dyshuarit iu afruan Dushkut në një zonë të Selanikut.

Hetuesit pretendojnë se 33-vjeçari Robert Elezaj përdori një pistoletë dhe qëlloi në drejtim të Dushkut, por 32-vjeçari nuk u plagos. Nga të shtënat, megjithatë, u lëndua një person tjetër që ndodhej pranë tij, ndërsa plumbat shkaktuan dëme edhe në një biznes në zonë.

Sipas të njëjtit hetim, edhe 26-vjeçari Rueldi Dragjoshi ka qëlluar me armë në drejtim të Dushkut, pa arritur ta godasë.

Ndërkohë, 31-vjeçari Sergo Elezaj dyshohet se i ka drejtuar armën Dushkut. Policia greke thotë se nuk ka qenë e mundur të përcaktohej nëse ai ka qëlluar me armë, por hetuesit e konsiderojnë të përfshirë në ngjarje edhe për shkak të ndihmës që dyshohet se u ka dhënë dy personave të tjerë.

Sipas autoriteteve, Sergo Elezaj i ka transportuar Robert Elezajn dhe Rueldi Dragjoshin drejt vendit të ngjarjes me një automjet të marrë me qira. Ai ka qëndruar me ta edhe gjatë zhvillimit të incidentit dhe më pas është larguar bashkë me dy të dyshuarit.

Edhe Dushku qëlloi me armë

Në momentin e përplasjes me armë, edhe 32-vjeçari Danjel Dushku dyshohet se ka qëlluar në drejtim të tre personave të arrestuar, pa mundur t’i plagosë.

Nga të shtënat e tij janë shkaktuar dëme në automjetin me të cilin kishin mbërritur tre të dyshuarit, si dhe në një tjetër makinë të parkuar pranë vendit të ngjarjes.

Dushku rezulton të ketë precedentë penalë në Greqi dhe Shqipëri. Sipas policisë greke, ai është vëllai i Fabio Dushkut, një shtetas shqiptar i dënuar në Greqi për vrasje dhe vepra të tjera penale.

Njëri tentoi të largohej nga policia

Gjatë operacionit për arrestimin e të dyshuarve, Sergo Elezaj tentoi t’u shpëtonte efektivëve, duke mos iu bindur urdhrave të tyre.

Sipas policisë, 31-vjeçari doli në ballkonin e banesës së tij dhe më pas kaloi në çatinë e një shtëpie ngjitur. Ai qëndroi aty deri në momentin kur u lokalizua dhe u arrestua nga forcat e policisë.

Gjatë kontrollit të banesës, autoritetet sekuestruan një pistoletë me karikator, shtatë fishekë dhe dy karta identiteti të falsifikuara.

Nga verifikimet rezultoi gjithashtu se Elezaj nuk dispononte dokumentet e kërkuara ligjore dhe ishte person në kërkim, pasi ndaj tij ishte në pritje një dënim për armëmbajtje pa leje.

Çfarë rezultoi për dy të arrestuarit e tjerë

Në rastin e Robert Elezajt, policia greke ka konstatuar se ai ishte gjithashtu person në kërkim, pasi ndaj tij kishte një dënim në pritje për lehtësimin e transportit të shtetasve të vendeve të treta që nuk kishin të drejtë të hynin në Greqi. Edhe ai rezultoi pa dokumentet e kërkuara ligjore.

Ndërkohë, Rueldi Dragjoshi, 26 vjeç, rezulton se është dënuar në Francë në vitin 2021 me 15 muaj burg për vepra që lidhen me trafikimin e heroinës dhe kokainës.

Sipas Policisë greke, të tre të arrestuarit kanë pasur më herët probleme me drejtësinë në Greqi, ku janë hetuar apo akuzuar për vepra të ndryshme, përfshirë vjedhje, trafikim të paligjshëm të migrantëve, plagosje të rënda, si dhe shkelje të legjislacionit për drogën dhe armët.

Hetimet për ngjarjen e janarit vijojnë për të përcaktuar plotësisht rrethanat e konfliktit me armë dhe rolin e secilit prej personave të përfshirë.