Babai i Ervis Martinajt shkon në GJKKO

Babai i Ervis Martinajt, një prej emrave më të njohur të botës së lojërave të fatit në Shqipëri dhe i shpallur i zhdukur prej kohësh, është paraqitur këtë të enjte në ambientet e Gjykatës së Posaçme Kundër Korrupsionit dhe Krimit të Organizuar.

Sipas pamjeve të siguruara, Mustafa Martinaj është parë duke hyrë i vetëm në godinën e GJKKO-së, pa u shoqëruar nga persona të tjerë.

Më herët, ai ka bërë publike pretendimet e tij se zotëron informacione dhe prova konkrete mbi vendndodhjen e trupit të pajetë të të birit, duke këmbëngulur se Ervis Martinaj është vrarë. Sipas tij, këto të dhëna nuk janë marrë në konsideratë nga institucionet përkatëse, pavarësisht rëndësisë që ato mund të kenë për zbardhjen e ngjarjes.

Prania e tij në GJKKO lidhet pikërisht me përpjekjet për të kërkuar vëmendje dhe reagim nga drejtësia mbi këtë çështje, e cila prej kohësh mbetet pa një përfundim zyrtar.