Begaj dekretoi datën e zgjedhjeve, reagon Kushtetuesja dhe KQZ

Gjykata Kushtetuese refuzoi të komentojë mbi vendimin e Presidentit të Republikës, Bajram Begaj, për dekretimin e datës 9 nëntor 2025 si ditë zgjedhjesh të pjesshme në Bashkinë e Tiranës. Kjo vjen ndërkohë që në Gjykatë është depozituar një ankimim nga pala mbrojtëse e ish-kryebashkiakut Erion Veliaj, i cili kundërshton shkarkimin e tij.

Gazetarja e Euronews Albania, Enkelejda Mema, i drejtoi pyetje Gjykatës Kushtetuese për qëndrimin e tyre lidhur me kushtetutshmërinë e këtij vendimi, duke përmendur nenin 115 të Kushtetutës, i cili parashikon pezullimin automatik të çdo vendimmarrjeje në rast ankimi. Përgjigjja nga Gjykata ishte e shkurtër: “Nuk kemi asnjë koment për çështjen.”

Në këtë kontekst, Presidenca dha një sqarim përmes një njoftimi zyrtar, duke justifikuar vendimin e Presidentit Begaj për shpalljen e zgjedhjeve të parakohshme në Tiranë, pavarësisht ankimimit të bërë nga ish-kryebashkiaku Veliaj në Kushtetuese.

Sipas Presidencës, ankimi për shkarkimin nga detyra për shkak të mosparaqitjes në punë, si në rastin konkret, nuk i përket juridiksionit të Gjykatës Kushtetuese, por duhet të shqyrtohet nga Gjykata Administrative.

Nga ana tjetër, KQZ duket se e ka pranuar dekretin dhe ka dhënë sinjalet sedo nisë puna për mbajtjen e zgjedhjeve. Përmes një postimi në Facebook, Ilirian Celibashi ka publikuar dekretin e Presidentit.

“Dekreti i Presidentit të Republikës për caktimin e datës 9 nëntor 2025 për zhvillimin e zgjedhjeve të pjesshme për kryetar të bashkive Tiranë, Vlorë, Berat, Mat, Cërrik dhe Tepelenë”, shkruan Celibashi.