Bisedat me Artur Hoxhosmanin: Na kanë spiunu!

 “Tonat ranë në Rotterdam”  Zbulohet biseda mes Ramazan Rrajës dhe Hoxhosmanit për kokainën e sekuestruar në Holandë

Dokumentet e siguruara nga dosja e grupit kriminal që u godit nga SPAK kanë zbuluar një rrjet trafiku droge nga Amerika Latine drejt Bashkimit Europian, me emra të njohur për drejtësinë shqiptare në krye. Njëri prej tyre është Ramazan Rraja, i përfshirë më herët në atentatin ndaj ish-prokurorit Arjan Ndoja. Këtë herë, ai del në skenë në rolin e porositësit dhe financuesit të një sasie prej 1484 kg kokaine të sekuestruar më 29 tetor 2020 në Rotterdam, Holandë.

Në aplikacionin e enkriptuar “SkyECC”, Rraja, nën pseudonimin JU6RE9, komunikon vazhdimisht me Artur Hoxhosmanin, i identifikuar me kodin VRHDIV. Në bisedën e datës 29.10.2020, të dy konfirmojnë që droga ishte e tyre dhe shfaqin mërzi, dyshime dhe revolta pas sekuestrimit të saj nga policia holandeze.

Në komunikimin e transkriptuar nga SPAK, Rraja thotë:

“Paska ra puna vlla, e jona në Rotterdam… Ja sa të shkoj ke shpia se kam videon. Do ia …. Maje mend ç’a do i boj… mka ik truni aty i kisha krejt shpresat.”

Sasia e sekuestruar – 1435 pako kokaine – ishte fshehur në thasë me kokrra kakaoje dhe kishte si “pronarë” të dyshuar Artur dhe Klevis Hoxhosmani, Ramazan Rrajën, dhe një person të paidentifikuar që përdorte emrin e koduar 6FJMOR.

“Big X”  spiuni misterioz që tradhtoi ngarkesën?

Në bisedat e siguruara nga SPAK, dyshimet për sekuestrimin bien mbi një person të quajtur “Big X”, i cili sipas tyre kishte dhënë sinjalin për të kapur drogën.

“Po vlla, po ty tkan thon dje, do të thotë që ato e kanë dit që dje… mtha i shok që i njef por hypjen direkt e njifni ju,” – shkruan BigX66N, duke aluduar për një rrjedhje informacioni të brendshme.

Pagesat për kokainën: jo banka, por 

sistemi “Hawala”

Në dosje janë përfshirë edhe foto kartëmonedhash dollari me shënime për pagesat e realizuara përmes sistemit të njohur si “Hawala” – një rrjet informal transferimi parash, që nuk kalon përmes kanaleve bankare, por përmes individëve që operojnë në vendet e ndryshme dhe që besojnë tek njëri-tjetri për shumat që kalojnë.

Ky sistem është përdorur shpesh nga rrjete të trafikut ndërkombëtar të drogës, dhe tani është bërë pjesë edhe e logjistikës financiare të krimit shqiptar jashtë vendit.

Rrënjët në atentatin ndaj Ndojës

Përfshirja e Ramazan Rrajës nuk është surprizë. SPAK ka identifikuar lidhjen e tij edhe me ngjarjen e rëndë të 1 nëntorit 2019, ku u plagos ish-prokurori i Durrësit, Arjan Ndoja, dhe Aleksandër Laho (Rrumi). Për këtë atentat, SPAK ka dalë në përfundimin se porosia për eliminim erdhi nga Plaurent Dervishaj, i arratisur në Dubai, ndërsa ekzekutimin e besoi pikërisht Ramazan Rrajës, bashkëpunëtorit të tij në trafikun ndërkombëtar të drogës.

Dosja SPAK shpalos një skemë ku krimi i organizuar shqiptar operon me teknologji të sofistikuara, komunikim të koduar dhe metodologji financiare të zhvilluara jashtë sistemit bankar, duke përdorur lidhje politike dhe rrënjë të thella kriminale.