Call center-at milionerë dhe heshtja e opozitës

Vëllezërit Prekaj në kërkim, lidhje politike dhe financiare me PD-në

Arjan, Agim dhe Alfred Prekaj, tre vëllezër nga Tropoja, janë shpallur në kërkim nga autoritetet shqiptare si të dyshuar për organizimin dhe drejtimin e një rrjeti të gjerë call center-ash, të akuzuar për mashtrime masive financiare. Byroja Kombëtare e Hetimit (BKH), në bashkëpunim me Policinë e Shtetit, ka ushtruar kontrolle në të paktën 28 objekte në kuadër të këtij hetimi të përmasave të mëdha.

Operacioni i zhvilluar më 16 janar nuk ka qenë i papritur për personat nën hetim. Sipas burimeve hetimore, vëllezërit Prekaj kishin ndërtuar një strukturë të sofistikuar sigurie, me persona të pozicionuar jashtë godinave dhe disa perimetra vëzhgimi, që monitoronin çdo lëvizje përreth ambienteve të call center-ave. Aktualisht, këta individë janë subjekt i verifikimeve të posaçme nga ana e hetuesve.

Burime pranë hetimit sqarojnë se nuk ka pasur asnjë dekonspirim nga ana e BKH-së apo institucioneve të tjera. Përkundrazi, nëse do të kishte rrjedhje informacioni, personat nën hetim do të kishin marrë masa shumë më të thella sigurie dhe nuk do ta kishin vijuar aktivitetin në mënyrë kaq të ekspozuar. Po ashtu, hetuesit janë të bindur se largimi i personave në kërkim nuk ka ndodhur vetëm pak orë përpara ndërhyrjes, por ka qenë i planifikuar më herët.

Një element domethënës i hetimit është fakti se vëllezërit Prekaj kanë pasur më herët call center të vendosur shumë pranë godinës së SPAK-ut, në zonën e njohur si “Momus”. Ky fakt forcon dyshimet se ata mund të kenë qenë në dijeni të pranisë së hetuesve gjatë ditëve të vëzhgimit, jo si pasojë e një aksioni të dekonspiruar, por falë një rrjeti informativ të ngritur prej kohësh.

Sipas të dhënave hetimore, Alfred Prekaj rezulton pronar i disa kompanive call center, ndër to edhe “Ballkanspro”, e regjistruar në vitin 2021. Burime pranë hetimit dyshojnë se qarkullimi financiar i kësaj veprimtarie arrin në 10–12 milionë euro në muaj, shifra që e ngre çështjen në një nivel të rëndë kriminal dhe financiar.

Hetimi është nxitur edhe pas një investigimi të emisionit investigativ italian “Le Iene”, i cili hodhi dritë mbi skemën e mashtrimeve dhe lidhjet ndërkombëtare të rrjetit. Megjithatë, pavarësisht përmasës së aferës dhe shumave marramendëse që përmenden, reagimi i opozitës shqiptare ka qenë thuajse inekzistent.

Në mënyrë të pazakontë, Sali Berisha, i njohur për reagime të shpejta dhe të zëshme për çdo hetim që prek qeverinë apo institucionet e drejtësisë, nuk ka përmendur asnjëherë publikisht vëllezërit Prekaj apo këtë operacion. Kjo heshtje bëhet edhe më domethënëse në dritën e informacioneve që flasin për lidhje financiare dhe interesa të përbashkëta mes vëllezërve Prekaj dhe figura të njohura të opozitës, përfshirë edhe sponsorizime apo mbështetje politike.

Persona pranë Berishës kanë tentuar ta relativizojnë çështjen, duke deklaruar se vëllezërit Prekaj janë thjesht “të punësuar” dhe se pronarët e vërtetë të call center-ave ende nuk janë zbuluar. Por ky argument bie ndesh me realitetin financiar të dyshuar, ku flitet për individë që qarkullojnë me automjete luksoze, si Ferrari, dhe zotërojnë mijëra metra katrorë pasuri në kullat më të shtrenjta të Tiranës, ndërkohë që përmenden qarkullime mujore dhjetëra milionë euro.

Në këtë kontekst, po bëhet gjithnjë e më e dukshme ajo që burime investigative e quajnë një “amnisti politike” ndaj vëllezërve Prekaj, e garantuar përmes heshtjes dhe relativizimit publik. Një heshtje që, në një realitet ku paratë, pushteti dhe politika ndërthuren hapur, flet më shumë sesa çdo deklaratë.