Thirrje për ndihmë: Po thyejnë dyert dhe dritaret

Një denoncim i mbërritur në redaksinë e Publik.al ngre shqetësimin për situatën e krijuar në godinën e konvikteve të vajzave në Qytetin Studenti, ku, sipas denoncuesit, një grup personash kanë hyrë në ambientet e godinës dhe kanë shkaktuar dëme, duke terrorizuar studentet që ndodheshin brenda.

Sipas denoncimit, personat në fjalë po paraqiten si protestues, por denoncuesi pretendon se ata nuk janë protestues të vërtetë, por persona të dërguar nga kryeministri Edi Rama. Ky pretendim nuk është konfirmuar në mënyrë të pavarur nga redaksia.

Dyer dhe dritare të thyera

Pamjet e dërguara në redaksi shoqërohen me raportime për dyer dhe dritare të thyera. Studentet brenda godinës thuhet se janë përfshirë nga frika për shkak të zhurmave dhe situatës së krijuar.

Në një moment të regjistruar, një studente dëgjohet duke folur me zë që i dridhet nga paniku. Ajo shprehet se nuk e kupton plotësisht se çfarë po ndodh, por dëgjon ulërima të shumta dhe persona që po thyejnë dyert e dritaret.

“Nuk e di, thjesht dëgjoj shumë ulërima dhe po thyejnë dyert edhe dritaret”, dëgjohet të thotë vajza, duke përshkruar situatën shqetësuese brenda konvikteve.

Pikëpyetje për sigurinë

Denoncimi ngre pikëpyetje serioze për sigurinë e studenteve, të cilat ndodhen në ambientet ku jetojnë dhe studiojnë. Ndërsa situata e raportuar kërkon verifikimin e plotë të rrethanave dhe identitetit të personave të përfshirë.

Redaksia e Publik.al po përcjell denoncimin dhe pamjet e mbërritura. Ndërsa pretendimet për autorët dhe motivet e ngjarjes mbeten për t’u verifikuar nga autoritetet.