Cllevio flet për Unikkatilin: Duhej të më kishte përkrahur!

Reperi i njohur Cllevio është rikthyer sërish në qendër të vëmendjes pas lirimit, duke u shfaqur si i ftuar në emisionin e moderatorit Meriton Mjekiqi. Në këtë dalje, ai foli hapur për kapitullin e ri në jetën e tij, për rikthimin në muzikë, si dhe për marrëdhëniet e tensionuara me disa emra të njohur të skenës së repit shqiptar.

Gjatë intervistës, Cllevio ndau detaje mbi rikthimin e tij në aktivitetin artistik dhe komentoi një nga performancat e fundit, të cilën e kishte përmbyllur me një këngë të Unikkatilit. I pyetur për këtë zgjedhje, ai dha një përgjigje me ngarkesë emocionale, duke theksuar rëndësinë e besnikërisë: “Njerëzve që i dua apo i kam dashur, mundohem t’u tregoj që jam këtu prapë për ta, edhe nëse ata nuk kanë qenë aty për mua”.

Më tej, ai u ndal te raporti me Unikkatilin, duke treguar se mes tyre ka pasur një lidhje të drejtpërdrejtë dhe se në fillim ishte pikërisht ky i fundit që e afroi pranë grupit. Megjithatë, sipas Cllevios, komunikimi mes tyre është zbehur me kalimin e kohës. Ai shtoi se “ai ka hallet e veta”, por nuk kurseu edhe shenja pakënaqësie për mungesën e mbështetjes.

Sipas reperit, kjo mungesë përkrahjeje ka qenë një pikë e ndjeshme për të: “Ai duhej të ishte më përkrahës për mua sepse unë ia kam ngritur kokën. Por, një gango ka ardhur nga Nju Jorku dhe këta nuk e mbajtën dot,” u shpreh ai, duke bërë edhe një krahasim të drejtpërdrejtë: “Po më përkrah Geti e s’po më përkrah Viktori”.

Në fund të bisedës, Cllevio theksoi qartë pozicionin e tij në skenën muzikore dhe refuzimin për të qenë nën hijen e kujtdo. Ai e mbylli me një deklaratë të fortë dhe vetëbesim të theksuar: “Unë nuk e dua refrenin. Nuk jam gango që të varem te komandanti. Unë nuk jam ushtar, unë jam gjeneral!”.