“Çmendet” Bitcoin, çmimi i kriptomonedhës shënon një tjetër rekord

Bitcoin, kriptomonedha më e madhe në botë sipas vlerës së tregut, ka arritur një nivel rekord të ri këtë të diel (5 tetor), duke u rritur me rreth 2.7% dhe duke prekur vlerën 125,245.57 dollarë, sipas të dhënave zyrtare të bursave ndërkombëtare.

Ky rekord i ri kalon nivelin më të lartë të mëparshëm prej 124,480 dollarësh, të shënuar në mes të gushtit, dhe vjen në një moment të rritjes së vazhdueshme të interesit të investitorëve institucionalë dhe politikave më të favorshme rregullatore nga administrata e Presidentit të SHBA-së, Donald Trump.

Bitcoin u rrit gjithashtu edhe të premten, për të tetën seancë radhazi, e mbështetur nga performanca pozitive e aksioneve amerikane dhe hyrjet në fondet e tregtuara në bursë që fokusohen në kriptomonedhën.

Ndërkohë, dollari amerikan u dobësua në fund të javës, duke regjistruar humbje kundrejt valutave kryesore. Rënia e tij lidhet me pasiguritë rreth mundësisë së një mbylljeje të qeverisë amerikane dhe shtyrjen e publikimit të të dhënave të rëndësishme ekonomike, si listat e pagave, të cilat janë kyçe për vlerësimin e drejtimit të ekonomisë së SHBA-së.