Rama ironizon PD: Prokuroria e Posaçme është stacioni i fundit i rrugës tuaj për pushtet

Politikë

Kryeministri Edi Rama ka ironizuar sot në Kuvend deklaratat e opozitës, sipas të cilave ushtria amerikane do ta largonte atë me helikopter, duke e krahasuar me diktatorin e Venezuelës, Nicolás Maduro.

Gjatë fjalës së tij në seancë plenare, Rama u shpreh se, meqë një skenar i tillë nuk ndodhi, opozita mund ta çojë në Prokurorinë e Posaçme ushtrinë amerikane. “Çojeni në SPAK, se tani që ushtria amerikane e anuloi hyrjen me helikopter në Kryeministri, SPAK është stacioni i fundit i rrugës tuaj për pushtet,” tha ai me ironi.

Rama vijoi duke hedhur poshtë akuzat dhe etiketimet e opozitës, duke theksuar se nuk ndjen nervozizëm, por durim përballë asaj që e cilësoi si retorikë të përsëritur. “Unë kam pasionin e atij që sheh sesi të gjitha kurthet në pyll janë plotë… Por për ato kurthe duhet durim. Sa më shumë më thoni ‘Ramaduro’, aq më shumë më shtoni durimin,” u shpreh kryeministri.

Në vijim të fjalës së tij, Rama ironizoi edhe mobilizimet e opozitës ndër vite, duke thënë se mbështetja e dikurshme është zbehur, ndërsa shtoi me tone sarkastike se opozita “fitoi” edhe për një arsye tjetër: “Ndalët pushtimin e Shqipërisë nga palestinezët”.

Deklaratat e Ramës vijnë në një klimë të tensionuar politike, ku akuzat, ironitë dhe përplasjet verbale mes mazhorancës dhe opozitës vijojnë të dominojnë debatin publik.