Kreu i Autoritetit të Konkurrencës shpall “pavarësinë absolute”

Kreu i Autoritetit të Konkurrencës, Denar Biba, ka zgjedhur sallën e Komisionit të Ekonomisë për të artikuluar një qëndrim të fortë mbi mënyrën si e koncepton funksionimin e institucionit që drejton. Vetëm pak muaj pasi u rikonfirmua në detyrë, ai deklaroi hapur se Autoriteti nuk do t’i japë llogari asnjë institucioni tjetër për vendimmarrjet e tij.

Gjatë raportimit vjetor, përplasja u fokusua te kërkesa e Kontrollit të Lartë të Shtetit për të audituar dosjet dhe vendimet e Autoritetit të Konkurrencës. Biba e kundërshtoi këtë kërkesë, duke e konsideruar si ndërhyrje në pavarësinë e institucionit.

“Erdhi KLSH tek ne dhe kërkoi çdo lloj informacioni konfidencial dhe sekret për të kontrolluar mbi vendimmarrjet tona. Në vlerësimin tonë, kjo përbën cënim të pastër të pavarësisë së institucionit,” u shpreh ai para deputetëve.

Në vijim, ai theksoi se as Kuvendi nuk ka të drejtë të ndërhyjë në vendimet e një institucioni të pavarur, duke nënvizuar kufijtë e rolit mbikëqyrës të Parlamentit.

“Nuk mundet një institucion i pavarur, në këtë rast KLSH, apo edhe Kuvendi i Republikës, përveçse si retorikë politike, të thotë që kjo vendimmarrja juaj është kështu apo ashtu. Nëse na keni mandatuar, keni besuar tek ne, tek profesionalizmi ynë”, deklaroi Biba.

Sipas tij, i vetmi autoritet që mund të vlerësojë vendimmarrjet e Autoritetit të Konkurrencës është sistemi gjyqësor, duke përjashtuar çdo mekanizëm tjetër kontrolli administrativ apo politik.

Këto deklarata kanë nxitur debat mbi kufijtë e pavarësisë institucionale dhe raportin e saj me llogaridhënien publike. Diskutimet bëhen edhe më të forta në një kohë kur tregu shqiptar vijon të përballet me sfida si dominimi i monopoleve dhe mungesa e konkurrencës efektive në sektorë të rëndësishëm.