Dështimi i policisë në Velipojë, Hita “fshin” drejtuesit në Shkodër

Një operacion i fundit në zonën e Velipojës ka çuar në masa të forta brenda radhëve të Policisë së Shtetit, pasi u zbulua një sipërfaqe e konsiderueshme e mbjellë me bimë narkotike në një territor të hapur dhe lehtësisht të verifikueshëm.

Drejtori i Përgjithshëm i Policisë së Shtetit, Skënder Hita, ka urdhëruar menjëherë nisjen e hetimit disiplinor dhe pezullimin nga detyra të disa drejtuesve lokalë të policisë në qarkun e Shkodrës, pas evidentimit të kësaj ngjarjeje të rëndë.

Sipas të dhënave zyrtare, në fshatin Reç i Ri, Njësia Administrative Velipojë, janë konstatuar të kultivuara plot 7,446 bimë të dyshuara narkotike të llojit cannabis sativa. Zbulimi i këtij plantacioni erdhi pas një informacioni të dërguar nga një qytetar në adresën elektronike të drejtorit të përgjithshëm, duke ngritur pikëpyetje serioze mbi kontrollin e territorit nga strukturat vendore të policisë.

Si pasojë, janë pezulluar nga detyra:

• Kryekomisar Bekim Lika, shef i Komisariatit të Policisë Shkodër
• Nënkomisar Zef Marku, shef i Stacionit të Policisë Velipojë
• Inspektor Samet Kadroji, ndihmës/specialist i Policimit në Zonë

Po ashtu, hetimi disiplinor ka përfshirë edhe dy punonjës të tjerë policie, pjesë e strukturave të kontrollit të territorit, ndaj të cilëve deri më tani nuk është marrë masë pezullimi.

Ky rast ka nxjerrë në pah mangësi të rënda në monitorimin e territorit dhe ka shtuar presionin mbi strukturat e policisë për të garantuar kontroll më të rreptë ndaj kultivimit të lëndëve narkotike. Hetimet vijojnë për të përcaktuar përgjegjësit konkrete dhe për të zbardhur plotësisht rrethanat që lejuan ekzistencën e një plantacioni kaq të madh pa u evidentuar më herët.