DETAJET/ Atentati në Rinas, 15 persona të shoqëruar

Detaje të reja janë zbuluar mbi atentatin e ndodhur dy ditë më parë në Rinas, ku u ekzekutua Gilmando Dani, krahu i djathtë i Emiljano Shullazit.

Mësohet se Dani ka marrë 20 plumba në trup, ndërsa në vendngjarje janë gjetur mbi 80 gëzhoja. Shoqëruesi i tij, punonjësi i Policisë së Shtetit, Muçi Shaljani (Sheqeri), vazhdon të jetë i intubuar në Spitalin e Traumës pas plagëve të rënda që përfshijnë 10 plumba në trup, dy prej të cilëve në kokë.

Sipas informacioneve, makina e përdorur nga autorët rezulton të ketë targat greke dhe të jetë vjedhur në Greqi në tetor të vitit 2022. Një orë pas atentatit, makina u gjet e djegur në fshatin Halil të Fushë-Krujës.

Deri tani janë shoqëruar të paktën 15 persona, kryesisht familjarë të viktimës dhe të plagosurit, të cilët kanë dhënë dëshmitë e tyre para grupit hetimor.

Që pas ngjarjes, policia ka kryer kontrolle në disa zona të Tiranës, Kamzës, Niklit dhe Fushë-Krujës, por ende nuk ka rënë në gjurmët e autorëve. Hetimet vazhdojnë intensivisht.