Dita që mund të ndryshojë fatin e Europës

Udhëheqja e Volodymyr Zelensky-t po kalon një nga momentet më të vështira që prej nisjes së pushtimit rus në vitin 2022, ndërkohë që Europa po përpiqet të forcojë mbështetjen ndaj Kievit. Pikërisht në këtë klimë tensioni, presidenti ukrainas mbërriti sot në Paris për t’u takuar me homologun francez, Emmanuel Macron.

Vizita vjen menjëherë pas skandaleve të korrupsionit brenda qeverisë së Kievit dhe në një fazë ku negociatat për paqe janë rindezur në Florida mes SHBA-ve dhe Ukrainës. Përballë këtij realiteti, vendet europiane synojnë të largohen nga roli dytësor dhe të formojnë një front të përbashkët me Zelensky-n për atë që e quajnë “një paqe të drejtë dhe të qëndrueshme”. Arsyeja është e qartë: fati i Ukrainës lidhet drejtpërdrejt me sigurinë e kontinentit.

Në Paris, mbërritja e Zelensky-t u parapri nga një deklaratë e fortë e ministrit të Jashtëm francez, i cili e cilësoi liderin ukrainas si një “legjendë të rezistencës” dhe theksoi se ai ka të drejtë të udhëheqë vendin drejt paqes. Franca, sipas tij, do të mbështesë çdo përparim të negociatave, me kusht që Moska të heqë dorë nga ambiciet për rindërtimin e ndikimit imperial përmes nënshtrimit të Ukrainës.

Megjithëse Europa synon unitetin në qëndrimet e saj, jo të gjithë janë në një linjë. Kryeministri hungarez Viktor Orbán vijon të shtyjë drejt idesë që Ukraina të kthehet në një “shtet satelit”, duke shtuar presionet mbi diplomacinë europiane.

Përtej formateve zyrtare, Zelensky ka zhvilluar kontakte të drejtpërdrejta me krerët kryesorë të Bashkimit Europian, me udhëheqës të vendeve anëtare dhe me Sekretarin e Përgjithshëm të NATO-s, me synimin për të koordinuar mbrojtjen kundër sulmeve ruse dhe për të siguruar rritjen e ndihmës ushtarake.

Ndërkohë, sot në Bruksel mblidhen ministrat e Mbrojtjes së BE-së së bashku me homologun ukrainas në një takim vendimtar për paketën e re të mbështetjes ushtarake për Kievin. Në këtë kontekst të tensionuar diplomatik dhe ushtarak, vizita e Zelensky-t në Paris shihet si një moment kyç – jo vetëm për të ardhmen e Ukrainës, por për sigurinë dhe stabilitetin e gjithë kontinentit europian.