Dosja ‘Partizani’, Gazmend Oketa përfundon në SPAK

Ish-ministri i Mbrojtjes dhe njëkohësisht ish-zv.kryeministër në qeverinë e Sali Berishës, Gazmend Oketa, është thirrur nga SPAK për të dëshmuar në seancën e radhës gjyqësore që lidhet me aferën e shumëdebatuar të privatizimit të ish-kompleksit sportiv “Partizani”. Seanca pritet të zhvillohet në orën 10:00 në ambientet e GJKKO, ndërsa vëmendja është përqendruar tek dëshmitë që mund të hedhin dritë mbi vendimmarrjet e kohës.

Së bashku me Oketën, në listën e dëshmitarëve janë edhe emra të tjerë si Elvira Lame, Paro Laçi dhe Isa Tare, ky i fundit i munguar në një seancë të mëparshme për shkak të qëndrimit jashtë vendit. Pritet që dëshmitë e tyre të japin detaje kyçe mbi mënyrën se si u realizua procesi i privatizimit dhe ndryshimet ligjore që e shoqëruan atë.

Një nga momentet më të forta të seancave të mëparshme ishte dëshmia e ish-ministrit të Sporteve, Ylli Pango. Ai deklaroi se kishte qenë kundër ndryshimit të destinacionit të kompleksit “Partizani”, duke kundërshtuar ndërtimin e 19 kullave në atë zonë. Sipas tij, ndryshimet ligjore të vitit 2008 nuk ishin iniciativë personale, por erdhën si propozim i qeverisë së asaj kohe.

Nga ana tjetër, ish-kryeministri Sali Berisha kishte akuzuar publikisht Pangon se kishte paraqitur një projektligj në mbrojtje të interesave të pronarëve të klubeve sportive. Megjithatë, në dëshminë e tij në GJKKO, Pango mohoi të kishte marrë pjesë në mbledhjen e qeverisë ku u miratua ky ligj.

Hetimi për këtë çështje nisi pas kallëzimit të bërë nga kreu i Grupit Parlamentar të Partisë Socialiste, Taulant Balla. Në kallëzim përmenden akuza për shpërdorim detyre ndaj ish-kryeministrit Sali Berisha, si dhe ndaj Jamarbër Malltezit dhe ish-ministrit Arben Imami.

Kompleksi sportiv “Partizani”, dikur në pronësi të Ministrisë së Mbrojtjes, sot është kthyer në një zonë me ndërtime të shumta pallatesh, duke ngritur pikëpyetje të forta mbi ligjshmërinë e procesit të privatizimit dhe përfituesit realë të kësaj prone publike.

Ndërkohë, procesi gjyqësor vijon të jetë në qendër të vëmendjes publike, pasi konsiderohet si një nga çështjet më të rëndësishme që lidhen me privatizimet dhe menaxhimin e pronave shtetërore në Shqipëri.