Dosja “Partizani”, ish-ministri Genc Ruli shkon në GJKKO

Ish-ministri i Ekonomisë, Genc Ruli, është paraqitur këtë të hënë në ambientet e Gjykatës së Posaçme Kundër Korrupsionit dhe Krimit të Organizuar, ku ka dhënë dëshminë e tij në lidhje me hetimet për çështjen e njohur si “Partizani”.

Prania e tij në gjykatë lidhet me rolin që ka pasur gjatë periudhës kur mbante detyrën e ministrit të Ekonomisë, në një kohë kur në krye të qeverisë ishte Sali Berisha. Ruli është thirrur për të sqaruar procedurat dhe vendimet institucionale që u ndoqën në procesin e privatizimit të ish-kompleksit sportiv “Partizani”, një çështje që vijon të jetë në fokus të drejtësisë.

Sipas burimeve, dëshmia e tij konsiderohet e rëndësishme për të hedhur dritë mbi mënyrën se si janë administruar pronat shtetërore në atë periudhë, si dhe për të kuptuar zinxhirin e vendimmarrjes brenda institucioneve përkatëse.

Hetimet për këtë dosje kanë përfshirë një sërë zyrtarësh dhe ish-zyrtarësh të lartë, ndërsa ndaj ish-kryeministrit Sali Berisha dhe dhëndrit të tij, Jamarbër Malltezi, është vendosur masa e sigurisë “detyrim paraqitje”.

Çështja “Partizani” mbetet një nga dosjet më të ndjekura nga opinioni publik, për shkak të përmasave dhe implikimeve që lidhen me menaxhimin e pronave publike dhe dyshimet për shkelje ligjore në procesin e privatizimit.