Durrësi dhe Lezha nën ujë, përmbytje pas reshjeve intensive

Reshjet intensive të shiut që kanë përfshirë gjatë orëve të fundit qytetin e Durrësit dhe disa zona të tjera të vendit kanë shkaktuar përmbytje të rrugëve dhe vështirësi serioze në qarkullimin e automjeteve.

Në Durrës, situata paraqitet problematike në disa prej akseve kryesore, ku uji ka mbuluar një pjesë të konsiderueshme të rrugëve. Më të prekura raportohen rruga “Taulantia”, rruga “Mars 91”, paralelja e portit të Durrësit, zona pranë stadiumit në lagjen 18, rruga afër shkollës “Qemal Mici” në lagjen 16, si edhe zona e Shkozetit. Si pasojë, qarkullimi i mjeteve është ngadalësuar ndjeshëm, ndërsa drejtuesit e automjeteve po përballen me vështirësi dhe këshillohen të tregojnë kujdes të shtuar.

Problematika nga reshjet e dendura është evidentuar edhe në qytetin e Lezhës, ku gjatë natës janë shënuar grumbullime uji në disa zona urbane. Më problematike paraqitet lagjja “Besëlidhja”, si dhe disa hyrje shkollash, ku niveli i ujit ka arritur disa centimetra, duke vështirësuar lëvizjen e këmbësorëve dhe automjeteve. Megjithëse nuk raportohen dëme materiale, situata ka krijuar shqetësime te banorët dhe prindërit e nxënësve.

Autoritetet lokale bëjnë me dije se problematika e përmbytjeve në Lezhë pritet të marrë zgjidhje përfundimtare me përfundimin e projektit të rehabilitimit të rrjetit të ujërave të bardha dhe të zeza, i cili është në zbatim prej disa muajsh. Ky projekt synon përmirësimin e menaxhimit të reshjeve intensive dhe shmangien e situatave të ngjashme në të ardhmen.