E bujshme! Ndërron ‘loja’ SHBA heq sanksionet ndaj naftës ruse

Departamenti i Thesarit i SHBA-së njoftoi se do të ndërmarrë hapa për të lehtësuar përkohësisht disa nga sanksionet ndaj eksporteve të naftës nga Rusia, në një përpjekje për të stabilizuar tregjet globale të energjisë pas rritjes së fortë të çmimeve.

Sipas vendimit të ri, do të lejohet përkohësisht shitja e naftës bruto dhe produkteve të naftës nga Rusia që tashmë janë ngarkuar në anije, deri më 11 prill.

Sekretari i Thesarit i Shteteve të Bashkuara, Scott Bessent, deklaroi se kjo masë synon të ruajë stabilitetin në tregjet ndërkombëtare të energjisë dhe të mbajë çmimet sa më të ulëta të jetë e mundur në një periudhë tensioni të lartë gjeopolitik.

Ai theksoi se vendimi lidhet edhe me situatën e tensionuar në Lindjen e Mesme dhe me pasiguritë që, sipas tij, janë shkaktuar nga veprimet e regjimit të Iranit.

Sipas raportimit të Sky News, sulmet ndaj infrastrukturës energjetike dhe ndërprerjet e trafikut detar në Ngushticën e Hormuzit kanë ndikuar drejtpërdrejt në tregjet globale të naftës.

Ngushtica e Hormuzit konsiderohet një nga rrugët më të rëndësishme për transportin e naftës në botë dhe çdo tension në këtë zonë reflektohet menjëherë në çmimet ndërkombëtare.

Si pasojë e zhvillimeve të fundit, çmimi i naftës është rritur përkohësisht mbi 100 dollarë për fuçi për herë të dytë gjatë kësaj jave, duke shtuar shqetësimet për ndikimin që kjo situatë mund të ketë në ekonominë globale.