E punësoi si dizenjuese, pronari përdhunon 21-vjeçaren në Tiranë

Një shtetas i huaj është arrestuar në Tiranë, pasi dyshohet se ka abuzuar seksualisht me një 21-vjeçare dhe më pas e ka shantazhuar duke e kërcënuar se do t’i tregonte familjes së saj për ngjarjen.

Sipas të dhënave zyrtare nga policia, ngjarja ka ndodhur në një banesë të marrë me qira në rrugën “Bogdanëve”, ku 48-vjeçari kishte ftuar të renë për arsye pune. Vajza kishte nisur të punonte për të si dizajnuese bizhuterish, një aktivitet që kryhej online për llogari të tij.

Sipas kallëzimit të bërë nga 21-vjeçarja, më 1 dhjetor 2025, ndërsa ndodhej në banesën e tij për të zhvilluar aktivitetin profesional, 48-vjeçari dyshohet se ka kryer marrëdhënie seksuale pa pëlqimin e saj.

Ajo ka deklaruar gjithashtu se situata ka vijuar edhe më pas, pasi burri e ka kërcënuar se do t’i tregonte familjes së saj për ngjarjen nëse nuk do të pranonte të vazhdonte marrëdhënien.

Pas kallëzimit, specialistët për hetimin e krimeve në Policia e Shtetit, në kuadër të veprimeve të ndërmarra nga Komisariati i Policisë Nr. 2, ndaluan shtetasin e huaj me inicialet M.F., 48 vjeç.

Gjatë kontrollit fizik ndaj tij, policia ka gjetur edhe një mjet prerës, i cili është sekuestruar si provë materiale.

Autoritetet bëjnë me dije se hetimet vijojnë për të sqaruar plotësisht rrethanat e ngjarjes dhe për të dokumentuar çdo element të mundshëm penal që lidhet me këtë rast.

“Specialistët për Hetimin e Krimeve të Komisariatit të Policisë Nr. 2:
-ndaluan shtetasin e huaj M. F., 48 vjeç, pasi një 21-vjeçare ka kallëzuar se ishte punësuar prej tij si dizajnuese për bizhu, punë që kryhej online për llogari të 48-vjeçarit, në banesën e tij të marrë me qira në Tiranë, në rrugën “Bogdanëve”. Sipas kallëzimit, më datë 01.12.2025, ndërsa ndodhej në këtë banesë për të ushtruar aktivitetin e punës, ky shtetas ka kryer marrëdhënie seksuale pa dëshirën e saj. Gjithashtu, sipas saj, marrëdhënia ka vijuar edhe më pas, pasi ai e ka shantazhuar se do t’i tregonte familjes së saj. Gjatë kontrollit fizik ndaj 48-vjeçarit iu gjet edhe një mjet prerës”, thuhet në njoftimin e policisë.