E rëndë në Himarë, humb jetën një punonjës i OSHEE gjatë punës

Një ngjarje tragjike është regjistruar në orët e para të mëngjesit në Himarë, ku një punonjës i Operatorit të Shpërndarjes së Energjisë Elektrike ka humbur jetën gjatë ushtrimit të detyrës.

Sipas informacioneve paraprake, incidenti ka ndodhur rreth orës 03:00, në momentin kur ekipet teknike ishin angazhuar për rikthimin e furnizimit me energji elektrike në zonat e prekura nga kushtet e vështira atmosferike dhe erërat e forta.

Viktima është një 55-vjeçar nga Elbasani, i cili ishte dërguar në Himarë për të mbështetur ndërhyrjet në rrjet pas dëmtimeve të shkaktuara nga moti. Gjatë punës në terren, ai ka pësuar një incident fatal, ndërsa dyshimet e para lidhen me një kontakt të mundshëm me energjinë elektrike.

Shkaku i saktë i vdekjes pritet të përcaktohet nga ekspertiza teknike dhe hetimet që janë në zhvillim. Në vendngjarje kanë mbërritur menjëherë shërbimet e policisë dhe grupi hetimor, të cilët po punojnë për të zbardhur plotësisht rrethanat e aksidentit.

Ngjarja vjen në një moment kur zona e Himarës dhe bregdeti janë përballur me stuhi të forta, të cilat kanë shkaktuar dëme materiale dhe probleme në rrjetin e shpërndarjes së energjisë elektrike.