E rëndë në Shkodër, 27-vjeçarja humb jetën pas lindjes së binjakëve

Një ngjarje e rëndë ka tronditur Shkodrën, ku një 27-vjeçare me inicialet M.S. ka ndërruar jetë vetëm pak orë pasi ishte bërë një apel urgjent për dhurim gjaku në ndihmë të saj.

E reja kishte sjellë në jetë binjakë, por gjendja e saj shëndetësore u përkeqësua menjëherë pas lindjes, duke kërkuar ndërhyrje të menjëhershme dhe sigurimin e gjakut të grupit 0 negativ.

Apeli për ndihmë u përhap me shpejtësi në rrjetet sociale dhe media, duke nxitur reagimin e menjëhershëm të dhjetëra qytetarëve që u paraqitën për të dhuruar gjak.

Pavarësisht përpjekjeve intensive të mjekëve dhe solidaritetit të treguar nga komuniteti, 27-vjeçarja nuk arriti t’i mbijetojë gjendjes kritike.

Ngjarja ka shkaktuar reagim të gjerë dhe dhimbje të thellë në opinionin publik, ndërsa familja e saj po përballet me një humbje të rëndë.

Qytetarë të shumtë kanë shprehur ngushëllimet dhe mbështetjen e tyre në këtë moment të vështirë.