Edi Rama duhet të vendosë: Anëtarësim në BE apo SULLTANATIN e Erdoganit?

Naim Noka

Mesazhi i Ambasadorit të BE-së, Silvio Gonzato, ishte i qartë dhe i prerë: Shqipëria ka një mundësi historike për të avancuar drejt anëtarësimit në BE, por për këtë nevojitet urgjentisht një dialog gjithëpërfshirës politik. BE-ja është e gatshme të mbështesë Shqipërinë, por në këmbim kërkon që të respektohen vlerat e demokracisë dhe funksionimi efektiv i institucioneve. Raporti për vitin 2024 e thekson fort këtë nevojë, duke nxjerrë në pah probleme serioze në funksionimin e parlamentit, ndikimin e polarizimit politik dhe ndërhyrjet e vazhdueshme në drejtësi.

Por ndërsa BE-ja kërkon dialog dhe standarde demokratike, Edi Rama vazhdon të mbajë një qëndrim përçmues dhe ironik ndaj opozitës, duke e quajtur “vetëvrasje politike” vendimin e saj për të mos bashkëpunuar.

Kjo retorikë agresive e Ramës, që shpesh kalon në tallje, jo vetëm që thellon ndarjen politike, por edhe lë të kuptohet një prirje autokratike që e largon Shqipërinë nga vlerat demokratike të BE-së.

Në vend që të përmbushë detyrat e lëna nga Brukseli dhe të ndërtojë ura bashkëpunimi, Rama vazhdon t’i japë prioritet modelit të qeverisjes së tij, i cili ngjan gjithnjë e më shumë me atë të një “Sulltani” modern. Ndërhyrjet në drejtësi, vendimet arbitrare dhe përqendrimi i pushtetit po e largojnë Shqipërinë nga modeli demokratik i kërkuar nga BE-ja. Në vend që të drejtojë vendin drejt integrimit, ai po e mban të bllokuar në një cikël të pafund përplasjeje dhe polarizimi politik.

Mesazhi i BE-së është një sinjal i fortë për Ramën dhe qeverinë e tij: ose të angazhohen seriozisht për të përmbushur kushtet e integrimit, ose të pranojnë se Shqipëria po largohet gjithnjë e më shumë nga rruga europiane. Nëse Rama është serioz për anëtarësimin në BE, atëherë është koha të ndalojë ironitë dhe të fillojë të dëgjojë zërin e qytetarëve dhe të opozitës për një dialog real dhe konstruktiv. Integrimi në BE kërkon demokraci funksionale, jo autoritarizëm të stilit Erdogan.